വടക്കേ അമേരിക്കൻ ഭൂഖണ്ഡത്തിലെ ഭൂരിഭാഗം പ്രദേശങ്ങളും ഉൾക്കൊള്ളുന്ന ഒരു ‘വിശാല യുഎസ് ഭൂപടം’ അമേരിക്കൻ പ്രസിഡന്റ് ഡോണൾഡ് ട്രംപ് ട്രൂത്ത് സോഷ്യൽ വഴി പുറത്തുവിട്ടു. കാനഡ, മെക്സിക്കോ, ഗ്രീൻലാൻഡ്, ക്യൂബ തുടങ്ങി ഒട്ടനവധി പ്രദേശങ്ങൾ ഉൾപ്പെടുത്തിയിരിക്കുന്ന ഈ ഭൂപടത്തിൽ, യുഎസിന്റെ പതാക പതിപ്പിച്ച ഒരു എഐ ചിത്രമാണ് ഉപയോഗിച്ചിരിക്കുന്നത്. എന്നാൽ, ഇതിന്മേൽ ഔദ്യോഗിക വിശദീകരണങ്ങളോ നയപ്രഖ്യാപനങ്ങളോ വൈറ്റ് ഹൗസിന്റെ ഭാഗത്തുനിന്നും ഉണ്ടായിട്ടില്ല.
ഈ ഭൂപടത്തിൽ വടക്കേ അമേരിക്കയിലെ 23 പരമാധികാര രാഷ്ട്രങ്ങളും ഗ്രീൻലാൻഡും ഉൾപ്പെട്ടിട്ടുണ്ടെങ്കിലും, ട്രിനിഡാഡ് ആൻഡ് ടൊബാഗോ, അറുബ തുടങ്ങിയ ചില കരീബിയൻ രാജ്യങ്ങളെ ഒഴിവാക്കിയിട്ടുണ്ട്. കാനഡയെ യുഎസിന്റെ 51-ാം സംസ്ഥാനമാക്കുമെന്ന പ്രഖ്യാപനത്തിനും, ഗ്രീൻലാൻഡ് സ്വന്തമാക്കാനുള്ള നീക്കങ്ങൾക്കും പിന്നാലെയാണ് ട്രംപിന്റെ ഈ പുതിയ നടപടി. കൂടാതെ, മെക്സിക്കോയും ക്യൂബയുമായുള്ള നയതന്ത്ര ബന്ധങ്ങൾ വഷളാകുന്നതിനിടയിൽ ന്യൂ മെക്സിക്കോയെ ‘ന്യൂ അമേരിക്ക’ എന്ന് പുനർനാമകരണം ചെയ്യണമെന്ന ആവശ്യവും ട്രംപ് ഉന്നയിച്ചിട്ടുണ്ട്.
