തൃശൂർ മണ്ണുത്തിയിലെ ബാറിൽ പതിനേഴുകാരന് മദ്യം വിളമ്പിയ സംഭവത്തിൽ ബാറുടമയ്ക്കെതിരെ മണ്ണുത്തി പോലീസ് കേസെടുത്തു. മണ്ണുത്തിയിൽ പ്രവർത്തിക്കുന്ന മയൂര ബാറിലാണ് പ്രായപൂർത്തിയാകാത്ത കുട്ടിക്ക് മദ്യം നൽകിയത്. സംഭവത്തിൽ പോലീസ് അന്വേഷണം ഊർജ്ജിതമാക്കിയിട്ടുണ്ട്.
ബാറിനുള്ളിൽ വച്ച് ഈ 17 വയസ്സുകാരൻ അടിപിടിയിൽ ഏർപ്പെട്ടതിനെ തുടർന്നാണ് സംഭവം പുറത്തറിയുന്നത്. തുടർന്ന് വിവരമറിഞ്ഞെത്തിയ പോലീസ് കുട്ടിയെ കസ്റ്റഡിയിലെടുത്ത് പരിശോധിച്ചപ്പോഴാണ് പ്രായപൂർത്തിയായിട്ടില്ലെന്ന കാര്യം വ്യക്തമായത്. ഇതിന് പുറമേ, വിഷയത്തിൽ നടപടി ആവശ്യപ്പെട്ട് കുട്ടിയുടെ അമ്മയും പോലീസിൽ പരാതി നൽകിയിട്ടുണ്ട്. സംഭവത്തെക്കുറിച്ച് വിശദമായ അന്വേഷണം നടന്നു വരികയാണെന്ന് മണ്ണുത്തി പോലീസ് അറിയിച്ചു.
