‘കാനഡ സ്ട്രോങ് പാസ്’ പദ്ധതിയുടെ കാലാവധി അവസാനിക്കാൻ രണ്ട് ആഴ്ച മാത്രം ശേഷിക്കെ, കനേഡിയൻ പൗരന്മാരും വിനോദസഞ്ചാരികളും ആനുകൂല്യങ്ങൾ പരമാവധി പ്രയോജനപ്പെടുത്തണമെന്ന് ഫെഡറൽ സർക്കാർ നിർദ്ദേശിച്ചു. സെപ്റ്റംബർ 7-ന് കാനഡ സ്ട്രോങ് പാസ് കാലാവധി അവസാനിക്കും. യുഎസുമായുള്ള വ്യാപാര യുദ്ധത്തിന്റെ പശ്ചാത്തലത്തിൽ ആഭ്യന്തര വിനോദസഞ്ചാരം പ്രോത്സാഹിപ്പിക്കുന്നതിനായി പ്രധാനമന്ത്രി മാർക്ക് കാർണിയാണ് ഈ പദ്ധതി നടപ്പിലാക്കിയത്. പദ്ധതി നടപ്പിൽ വന്നതോടെ രാജ്യത്തിനുള്ളിൽ തന്നെ യാത്ര ചെയ്യുന്ന കനേഡിയൻ പൗരന്മാരുടെ എണ്ണം വർധിച്ചതായി സ്റ്റാറ്റിസ്റ്റിക്സ് കാനഡയുടെ കണക്കുകൾ വ്യക്തമാക്കുന്നു. സെപ്റ്റംബർ 7-ന് ഈ പദ്ധതി അവസാനിക്കുമെങ്കിലും, വരാനിരിക്കുന്ന ശൈത്യകാലത്തും (ഡിസംബർ-ജനുവരി) സമാനമായ ആനുകൂല്യങ്ങളോടെ ‘കാനഡ സ്ട്രോങ് പാസ്’ തിരിച്ചെത്തുമെന്നാണ് പ്രതീക്ഷിക്കുന്നത്.
പാർക്സ് കാനഡയുടെ കീഴിലുള്ള ദേശീയോദ്യാനങ്ങളിലും ചരിത്ര സ്മാരകങ്ങളിലും സൗജന്യ പ്രവേശനം. ക്യാമ്പിങ് ഉൾപ്പെടെയുള്ള താമസ സൗകര്യങ്ങൾക്ക് 25% ഇളവ് എന്നിവയാണ് പാസിൻ്റെ പ്രധാന ആനുകൂല്യങ്ങൾ. മ്യൂസിയങ്ങളിലും ഗാലറികളിലും 17 വയസ്സിന് താഴെയുള്ളവർക്ക് സൗജന്യ പ്രവേശനവും 18 മുതൽ 24 വയസ്സ് വരെയുള്ളവർക്ക് 50% ഇളവും ലഭിക്കും. വിയാ റെയിൽ (Via Rail) വഴി യാത്ര ചെയ്യുന്ന 17 വയസ്സിൽ താഴെയുള്ള കുട്ടികൾക്ക് സൗജന്യ യാത്രയും , 18-24 പ്രായക്കാർക്ക് 25% ടിക്കറ്റ് ഇളവും ലഭിക്കും.
