ടെക്സസിലെ മലയാളി സമാജം ഓഫ് ലീഗ് സിറ്റി (MSOLC) തങ്ങളുടെ പതിനൊന്നാം വാർഷികത്തോടനുബന്ധിച്ച് സംഘടിപ്പിച്ച ‘ആവണിത്തെന്നൽ 2026’ ഓണാഘോഷം ആഗസ്റ്റ് 15-ന് ലീഗ് സിറ്റിയിലെ ജോണി അരോൾഫോ സിവിക് സെന്ററിൽ പ്രൗഢഗംഭീരമായി ആഘോഷിച്ചു. സമാജത്തിന്റെ ചരിത്രത്തിൽ ഇന്നുവരെ കാണാത്തവിധം നവീനവും വൈവിധ്യമാർന്നതുമായ കലാപരിപാടികളാണ് ഇത്തവണ ഒരുക്കിയിരുന്നതെന്ന് പ്രസിഡന്റ് ബിജോ സെബാസ്റ്റ്യനും സെക്രട്ടറി ഡോ. ജേക്കബ് തെരുവത്തും വ്യക്തമാക്കി. വൻതോതിലുള്ള പ്രവാസി കുടുംബങ്ങളുടെ സാന്നിധ്യം കൊണ്ട് ചടങ്ങ് ശ്രദ്ധേയമായി.
ചെണ്ടമേളവും താലപ്പൊലിയും അകമ്പടിയേകിയ ചടങ്ങിൽ മാവേലി മന്നനെ വേദിയിലേക്ക് ആനയിച്ചുകൊണ്ടാണ് ആഘോഷങ്ങൾക്ക് തുടക്കമിട്ടത്. തുടർന്ന് പരമ്പരാഗത ശൈലിയിലുള്ള സാംസ്കാരിക ഘോഷയാത്ര, പുലികളി, നാടൻപാട്ടുകൾ, വിവിധ നൃത്ത-സംഗീത വിരുന്നുകൾ എന്നിവ അരങ്ങേറി. ലീഗ് സിറ്റി മേയർ നിക്ക് ലോങ്, ഗാൽവസ്റ്റൺ കൗണ്ടി ഷെരീഫ് ജിമ്മി ഫുൾട്ടൻ എന്നിവർ ഉൾപ്പെടെ ഭരണനേതാക്കളും സാംസ്കാരിക നായകരും ചടങ്ങിൽ വിശിഷ്ടാതിഥികളായി പങ്കെടുത്തു. ഹൂസ്റ്റൺ ശ്രീ ഗുരുവായൂരപ്പൻ ക്ഷേത്രം ഒരുക്കിയ അലങ്കാരങ്ങൾ വേദിയെ കൂടുതൽ മനോഹരമാക്കി.
ചടങ്ങിൽ വെച്ച് പ്രമുഖ ആരോഗ്യപ്രവർത്തകനായ ഡോ. സച്ചുമോർ തോമസിനെ അദ്ദേഹത്തിന്റെ ജീവകാരുണ്യ സേവനങ്ങളെ മാനിച്ച് പ്രത്യേകമായി ആദരിച്ചു. ലീഗ് സിറ്റി മേയർ നിക്ക് ലോങ് പ്രശംസാഫലകവും ഫ്രണ്ട്സ്വുഡ് മേരി ക്വീൻ കത്തോലിക്കാ ദേവാലയ വികാരി ഫാ. തോമസ് വെള്ളാപ്പള്ളി പൊന്നാടയും നൽകി അദ്ദേഹത്തെ ആദരിച്ചു; സമാജത്തിന്റെ ചരിത്രത്തിൽ ആദ്യമായാണ് ഒരാളെ പൊന്നാടയണിയിച്ച് ആദരിക്കുന്നത്. ഗാൽവസ്റ്റൺ കൗണ്ടി ഷെരീഫ് ഓഫീസിന്റെ ഒഫീഷ്യൽ മെഡിക്കൽ ഡോക്ടറും പ്രദേശത്തെ 13-ഓളം ആരോഗ്യ സ്ഥാപനങ്ങളുടെ തലവനുമായ ഡോ. സച്ചുമോറിന്റെ പിന്തുണയ്ക്ക് ഭാരവാഹികൾ നന്ദിയറിയിച്ചു.
കുട്ടികൾക്കും മുതിർന്നവർക്കുമായി വടംവലി, ചാക്കിലോട്ടം തുടങ്ങിയ കായിക മത്സരങ്ങളും നടന്നു. ഈ ആഘോഷം വൻ വിജയമാക്കാൻ സഹായിച്ച എല്ലാവർക്കും സമാജം ഭാരവാഹികളായ ബിജോ സെബാസ്റ്റ്യൻ (പ്രസിഡന്റ്), ഡോ. ജേക്കബ് തെരുവത്ത് (സെക്രട്ടറി), റോബിൻ തോമസ് (ട്രഷറർ) എന്നിവർ നന്ദി രേഖപ്പെടുത്തി.
