നോവസ്കോഷ തലസ്ഥാനമായ ഹാലിഫാക്സ് നഗരമധ്യത്തിൽ ഇന്ത്യൻ വംശജൻ വംശീയാതിക്രമത്തിന് ഇരയായി. ശനിയാഴ്ച ഉച്ചയ്ക്ക് ലോവർ വാട്ടർ സ്ട്രീറ്റിൽ വെച്ചാണ് ഇന്ത്യൻ വംശജനായ ഷാലു ഷാജനെ അജ്ഞാതൻ ആക്രമിച്ചത്. കാർ പാർക്ക് ചെയ്ത ശേഷം പുറത്തിറങ്ങിയ ഷാലുവിനെ അപരിചിതനായ വ്യക്തി വംശീയമായി അധിക്ഷേപിക്കുകയും ഭീഷണിപ്പെടുത്തുകയുമായിരുന്നു.
കയ്യിലുണ്ടായിരുന്ന ബാഗ്പൈപ്പ് ഉപയോഗിച്ച് കാറിന്റെ സൈഡ് മിററിലും തുടർന്ന് ട്രങ്കിലും അക്രമി അടിച്ചതായി ഷാലു പറയുന്നു. തുടർന്ന് അക്രമി, “സ്വന്തം രാജ്യത്തേക്ക് മടങ്ങിപ്പോകൂ” എന്നും സ്ഥിരതാമസത്തിനുള്ള പെർമിറ്റ് ലഭിച്ചിട്ടുണ്ടോ എന്നും ചോദിച്ചതായി അദ്ദേഹം പരാതിയിൽ പറയുന്നു. സംഭവത്തിൽ ഹാലിഫാക്സ് പോലീസ് അന്വേഷണം ആരംഭിച്ചു. സമീപകാലത്ത് സൗത്ത് ഏഷ്യൻ വംശജർക്ക് നേരെ കാനഡയിൽ അതിക്രമങ്ങൾ വർധിച്ചു വരികയാണെന്ന് ഇൻഡോ-കനേഡിയൻ അസോസിയേഷൻ ഓഫ് നോവസ്കോഷ അറിയിച്ചു. സംഭവത്തിൽ അസോസിയേഷൻ ആശങ്ക രേഖപ്പെടുത്തി.
