കാനഡയിലെ തൊഴിലില്ലായ്മ നിരക്ക് കഴിഞ്ഞ രണ്ടു വർഷത്തിനിടയിലെ ഏറ്റവും താഴ്ന്ന നിലയിലേക്ക് എത്തിയതായി സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തു. ജൂലൈയിൽ 75,000 തൊഴിലവസരങ്ങൾ കൂട്ടിച്ചേർത്തതോടെ തൊഴിലില്ലായ്മ നിരക്ക് 6.4 ശതമാനമായി കുറഞ്ഞു. മൊത്ത-ചില്ലറ വ്യാപാര മേഖലയിൽ മാത്രം 21,000 പുതിയ തൊഴിലവസരങ്ങൾ സൃഷ്ടിച്ചതായി ഫെഡറൽ ഏജൻസിയുടെ ലേബർ ഫോഴ്സ് സർവേയിൽ പറയുന്നു.
ഏപ്രിൽ മുതൽ രാജ്യത്ത് 181,000 തൊഴിലവസരങ്ങളും ഒരു വർഷം മുമ്പുള്ളതിനേക്കാൾ 196,000 തൊഴിലവസരങ്ങളും വർധിച്ചതായി സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തു. അതേസമയം ഒൻ്റാരിയോയിലാണ് ജൂലൈയിൽ ഏതൊരു പ്രവിശ്യയിലും ഏറ്റവും കൂടുതൽ തൊഴിലവസരങ്ങൾ സൃഷ്ടിച്ചത്. ഇതിൽ ഭൂരിഭാഗവും പ്രൊഫഷണൽ, ശാസ്ത്ര, സാങ്കേതിക സേവന മേഖലകളിലാണ്. കഴിഞ്ഞ മാസം കാനഡ 15,000 തൊഴിലവസരങ്ങൾ സൃഷ്ടിക്കുമെന്ന് സാമ്പത്തിക വിദഗ്ധർ പ്രവചിച്ചിരുന്നു.
