കലൂർ ജവഹർലാൽ നെഹ്റു സ്റ്റേഡിയത്തിൽ 23-ാം തീയതി നടക്കുന്ന ബ്രസീൽ ലെജൻഡ്സ് – ഇന്ത്യ ഓൾ സ്റ്റാർസ് ഫുട്ബോൾ മത്സരത്തോടനുബന്ധിച്ച് കൊച്ചി മെട്രോ പ്രത്യേക സർവീസുകൾ പ്രഖ്യാപിച്ചു. മത്സരത്തിന് ശേഷം സ്റ്റേഡിയത്തിൽ നിന്നുള്ള ആരാധകരുടെ തിരക്ക് നിയന്ത്രിക്കുന്നതിനായി രാത്രി 9 മണിക്കും 10 മണിക്കും ഇടയിൽ 4 അധിക മെട്രോ ട്രെയിനുകൾ സർവീസ് നടത്തുന്നതാണ്. കൂടാതെ, അടിയന്തര സാഹചര്യങ്ങൾക്കായി ഒരു ട്രെയിൻ സ്റ്റാൻഡ്ബൈ ആയി സജ്ജീകരിച്ചിട്ടുണ്ടെന്നും അധികൃതർ അറിയിച്ചു.
സ്റ്റേഷനിലെ തിരക്ക് ഒഴിവാക്കുന്നതിന്റെ ഭാഗമായി കലൂർ ജെഎൻഎൻ മെട്രോ സ്റ്റേഷനിൽ രാത്രി 8 മുതൽ 11:30 വരെ 8 അധിക ടിക്കറ്റ് കൗണ്ടറുകൾ പ്രവർത്തിക്കും. യാത്രക്കാർ സ്റ്റേഷനിൽ എത്തുമ്പോൾ തന്നെ മടക്കയാത്രയ്ക്കുള്ള റിട്ടേൺ ക്യുആർ ടിക്കറ്റുകൾ മുൻകൂട്ടി എടുക്കണമെന്ന് മെട്രോ അധികൃതർ അഭ്യർത്ഥിച്ചിട്ടുണ്ട്. ഈ ക്യുആർ ടിക്കറ്റുകൾ ഉപയോഗിച്ച് ക്യൂ നിൽക്കാതെ നേരിട്ട് എഎഫ്സി ഗേറ്റുകൾ വഴി യാത്ര ചെയ്യാം.
