പ്രതിപക്ഷ പാർട്ടിയായ കൺസർവേറ്റീവുകൾക്ക് തിരിച്ചടിയായി എംപി ലാറി ബ്രോക്ക് തന്റെ പാർലമെൻ്റ് അംഗത്വം അടുത്ത മാസം രാജിവയ്ക്കുമെന്ന് പ്രഖ്യാപിച്ചു. പ്രമുഖ ക്രമസമാധാന വക്താവും ബ്രാൻ്റ്ഫോർഡ്-ബ്രാൻ്റ് സൗത്ത്-സിക്സ് നേഷൻസ് റൈഡിങ് കൺസർവേറ്റീവ് എംപിയുമായ ബ്രോക്ക്, സെപ്റ്റംബർ 18 ന് ഔദ്യോഗികമായി തന്റെ സ്ഥാനം രാജിവെക്കുമെന്ന് സോഷ്യൽ മീഡിയ പോസ്റ്റിലൂടെ അറിയിച്ചു. ലാറി ബ്രോക്കിന്റെ രാജിയോടെ കൺസർവേറ്റീവ് കോക്കസിൽ മറ്റൊരു ഒഴിവ് ഉണ്ടാകുകയും തെക്കുപടിഞ്ഞാറൻ ഒൻ്റാരിയോ റൈഡിങ്ങിന് ഒരു ഉപതിരഞ്ഞെടുപ്പിന് കാരണമാവുകയും ചെയ്യും.
2021 ൽ ലിബറൽ സ്ഥാനാർത്ഥി ജോയ് ഒ’ഡോണലിനെ പരാജയപ്പെടുത്തി കൺസർവേറ്റീവുകൾക്ക് വേണ്ടി റൈഡിങ് പിടിച്ചെടുത്തുകൊണ്ട് ബ്രോക്ക് ആദ്യമായി തിരഞ്ഞെടുക്കപ്പെട്ടു. 2025 ൽ ഭൂരിപക്ഷം വർധിപ്പിച്ച അദ്ദേഹം വീണ്ടും തിരഞ്ഞെടുക്കപ്പെട്ടു.
