ബ്രിട്ടീഷ് കൊളംബിയയിലെ ചില്ലിവാക്കിൽ രണ്ട് വിമാനങ്ങൾ ആകാശത്ത് കൂട്ടിയിടിച്ച് ഒരാൾ മരിച്ചതായി അധികൃതർ അറിയിച്ചു. തിങ്കളാഴ്ച വൈകുന്നേരം 5:20 ഓടെയാണ് സംഭവം. രണ്ട് ഫ്ലൈയിങ് സ്കൂളുകളിൽ നിന്നുള്ള വിമാനങ്ങളാണ് അപകടത്തിൽപ്പെട്ടത്.
അപകടത്തിൽപ്പെട്ട ഒരു വിമാനം സുരക്ഷിതമായിചില്ലിവാക്ക് എയർപോർട്ടിൽ അടിയന്തര ലാൻഡിങ് നടത്തി. അതിലെ യാത്രക്കാർക്ക് ആർക്കും പരുക്കേറ്റിട്ടില്ല. എന്നാൽ, രണ്ടാമത്തെ വിമാനം സമീപത്തുള്ള ക്വാറിയിലെ വെള്ളക്കെട്ടിലേക്ക് (ലഗൂൺ) പതിച്ചു. തുടർന്ന് നടന്ന അന്വേഷണത്തിൽ ഈ വിമാനത്തിലുണ്ടായിരുന്ന ഒരാളുടെ മൃതദേഹം ആർസിഎംപി അണ്ടർവാട്ടർ റിക്കവറി ടീം കണ്ടെത്തി. രണ്ട് സെസ്ന 172 വിമാനങ്ങളാണ് അപകടത്തിൽപ്പെട്ടത്. ട്രാൻസ്പോർട്ടേഷൻ സേഫ്റ്റി ബോർഡ് അന്വേഷണം ആരംഭിച്ചു.
