ടൊറൻ്റോയിലും ഒൻ്റാരിയോയുടെ ഭൂരിഭാഗം പ്രദേശങ്ങളിലും കടുത്ത ചൂട് അനുഭവപ്പെടുമെന്ന് എൻവയൺമെൻ്റ് കാനഡ മുന്നറിയിപ്പ് നൽകി. ഈർപ്പം കാരണം താപനില ചൊവ്വാഴ്ച 43 ഡിഗ്രി സെൽഷ്യസും ബുധനാഴ്ച 44 ഡിഗ്രി സെൽഷ്യസുമായിരിക്കും. രാത്രി താപനില 21 മുതൽ 25 ഡിഗ്രി സെൽഷ്യസ് വരെയായി തുടരുമെന്നും ഫെഡറൽ ഏജൻസി അറിയിച്ചു.
കനത്ത ചൂടിനെത്തുടർന്ന് ടൊറൻ്റോയിലെ പബ്ലിക് പൂളുകളുടെ പ്രവർത്തന സമയം ദീർഘിപ്പിച്ചു. കൂടാതെ നഗരത്തിലുടനീളം 500 കൂളിംഗ് സെന്‍ററുകൾ തുറന്നിട്ടുണ്ടെന്നും ടൊറൻ്റോ മെഡിക്കൽ ഓഫീസർ ഓഫ് ഹെൽത്ത് അറിയിച്ചു. സുരക്ഷാ പ്രശ്നങ്ങൾ കാരണം ഗോ ട്രെയിനുകൾ (GO Train) വേഗത കുറച്ചായിരിക്കും സർവീസ് നടത്തുകയെന്ന് മെട്രോലിങ്ക്സ് റിപ്പോർട്ട് ചെയ്തു.
ഇന്ന് നടക്കുന്ന കാനഡ ഡേ ആഘോഷങ്ങളിലും വ്യാഴാഴ്ച രാത്രി 7 മണിക്ക് നടക്കുന്ന പോർച്ചുഗൽ- ക്രൊയേഷ്യ ലോകകപ്പ് മത്സരത്തിലും പങ്കെടുക്കുന്നവർ നിർജ്ജലീകരണം ഒഴിവാക്കാൻ ആവശ്യമായ സുരക്ഷാ നടപടികൾ സ്വീകരിക്കണം. അതേസമയം ഉഷ്ണതരംഗത്തോടൊപ്പം ശനിയാഴ്ച വരെ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്നും ഞായറാഴ്ചയോടെ അന്തരീക്ഷത്തിലെ ഈർപ്പം കുറയുമെന്നും കാലാവസ്ഥാ നിരീക്ഷകർ പ്രവചിക്കുന്നു.
