35,000 അടി ഉയരത്തിലൂടെ മേഘങ്ങൾക്കിടയിലൂടെ സുഗമമായി പറക്കുന്ന വിമാനം യാതൊരു മുന്നറിയിപ്പുമില്ലാതെ നൂറുകണക്കിന് അടി താഴേക്ക് പതിക്കുന്നത് യാത്രക്കാരെ സംബന്ധിച്ച് അങ്ങേയറ്റം ഭയപ്പെടുത്തുന്ന ഒരു അനുഭവമാണ്. പുറമെ ശാന്തമെന്ന് തോന്നുന്ന ആകാശത്ത് അതിശക്തമായ വായുപ്രവാഹങ്ങളും ആകാശച്ചുഴികളും ഒളിഞ്ഞിരിപ്പുണ്ട്. ഇത്തരം അദൃശ്യ പ്രതിഭാസങ്ങളാണ് വിമാനങ്ങളെ പെട്ടെന്ന് താഴേക്ക് വലിച്ചെറിയുന്നത്.
ഇതിൽ ഏറ്റവും അപകടകരമായ ഒന്നാണ് ക്ലിയർ എയർ ടർബുലൻസ് (CAT) അഥവാ തെളിഞ്ഞ കാലാവസ്ഥയിലുള്ള ടർബുലൻസ്. ആകാശത്ത് മേഘങ്ങളോ മറ്റ് മുന്നറിയിപ്പുകളോ ഇല്ലാത്തതിനാൽ വിമാനങ്ങളുടെ റഡാറുകൾക്ക് ഇതിന്റെ സാന്നിധ്യം മുൻകൂട്ടി കണ്ടെത്താൻ സാധിക്കാറില്ല. ഇത് കൂടാതെ ശക്തമായ കൊടുങ്കാറ്റുകളും കാറ്റിന്റെ പെട്ടെന്നുള്ള ഗതിമാറ്റങ്ങളും വിമാനത്തിന്റെ സന്തുലിതാവസ്ഥയെ തകിടം മറിക്കാറുണ്ട്.
ചെറിയ കുലുക്കങ്ങളെ ഓട്ടോപൈലറ്റ് സംവിധാനത്തിന് പ്രതിരോധിക്കാൻ കഴിയുമെങ്കിലും, ശക്തമായ ടർബുലൻസ് ഉണ്ടാകുമ്പോൾ പൈലറ്റുമാർ ഓട്ടോപൈലറ്റ് ഓഫ് ചെയ്ത് മാനുവൽ മോഡിലേക്ക് മാറുകയാണു പതിവ്. ഇത്തരം സന്ദർഭങ്ങളിൽ വിമാനത്തെ ബലമായി നിയന്ത്രിക്കാൻ ശ്രമിക്കുന്നതിനേക്കാൾ, അതിന്റെ സ്വാഭാവികമായ ഘടനയ്ക്ക് അനുസരിച്ച് ആടിയുലയാൻ അനുവദിക്കുന്നതാണ് സുരക്ഷിതം. തുടർന്ന് പൈലറ്റുമാർ വിമാനത്തിന്റെ വേഗത കുറയ്ക്കുകയും, എയർ ട്രാഫിക് കൺട്രോളുമായി ബന്ധപ്പെട്ട് സുരക്ഷിതമായ മറ്റൊരു ഉയരത്തിലേക്ക് വിമാനം മാറ്റുകയും ചെയ്യും.
