പത്തനംതിട്ടയിൽ ലഹരിവിരുദ്ധ സംഘടനയുടെ ഭാരവാഹിയായ യുവാവിനെ മയക്കുമരുന്നുമായി പോലീസ് പിടികൂടി. എഴുറ്റൂർ കൈമല പുത്തൻപുരയ്ക്കൽ സ്വദേശിയായ 25 വയസ്സുകാരൻ ഷെർഫിൻ സെബാസ്റ്റ്യനെയാണ് 1.590 ഗ്രാം എംഡിഎംഎയുമായി ജില്ലാ ഡാൻസാഫ് സംഘം അറസ്റ്റ് ചെയ്തത്. ജില്ലാ പോലീസ് മേധാവിക്ക് ലഭിച്ച രഹസ്യവിവരത്തെ തുടർന്ന് കഴിഞ്ഞ കുറച്ചു ദിവസങ്ങളായി പോലീസ് ഇയാളെ നിരീക്ഷിച്ചു വരികയായിരുന്നു. തുടർന്ന് ഞായറാഴ്ച ഉച്ചയ്ക്ക് ഇയാളുടെ വീട്ടിൽ നടത്തിയ പരിശോധനയിലാണ് പുസ്തകങ്ങൾക്കിടയിൽ പ്രത്യേകം തയാറാക്കിയ രഹസ്യ അറയിൽ ഒളിപ്പിച്ച നിലയിൽ മയക്കുമരുന്ന് കണ്ടെത്തിയത്. ‘ആന്റി ഡ്രഗ്സ് മൂവ്മെന്റ് ഇൻ നേഷൻ’ എന്ന സംഘടനയുടെ യൂത്ത് മൂവ്മെന്റ് സംസ്ഥാന പ്രസിഡന്റ് എന്ന് വ്യക്തമാക്കുന്ന തിരിച്ചറിയൽ കാർഡും ഇയാളുടെ പക്കൽ നിന്ന് പോലീസ് കണ്ടുകെട്ടിയിട്ടുണ്ട്.
അറസ്റ്റിലായ പ്രതിയെ പെരുമ്പെട്ടി പോലീസ് സ്റ്റേഷനിലെത്തിച്ച് വിശദമായി ചോദ്യം ചെയ്തപ്പോഴാണ് ഇയാളുടെ ക്രിമിനൽ പശ്ചാത്തലം പുറത്തുവന്നത്. എറണാകുളത്തെ പാലാരിവട്ടം, ടൗൺ സ്റ്റേഷനുകളിലെ ലഹരിമരുന്ന് കേസുകളിലും, കോയിപ്രം സ്റ്റേഷനിൽ രജിസ്റ്റർ ചെയ്ത സ്ത്രീകളെ ആക്രമിച്ച കേസ് ഉൾപ്പെടെയുള്ള മറ്റ് രണ്ട് ക്രിമിനൽ കേസുകളിലും ഇയാൾ പ്രതിയാണെന്ന് ജില്ലാ പോലീസ് മേധാവി അറിയിച്ചു. പിടികൂടിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തിട്ടുണ്ട്.
