ഒൻ്റാരിയോയിലെ ഹൈവേകളിലൂടെ ഇനി ഡ്രൈവർമാർക്ക് പറക്കാം. പ്രവിശ്യയിലെ ഹൈവേകളിലെ വേഗപരിധി വർധിപ്പിക്കാൻ ഒരുങ്ങുകയാണ് ഒൻ്റാരിയോ സർക്കാർ. ഹൈവേയിൽ വേഗത പരിധി മണിക്കൂറിൽ 100 ​​കിലോമീറ്ററിൽ നിന്ന് 110 കിലോമീറ്ററായി ഉയർത്തുമെന്ന് ഗതാഗത മന്ത്രി പ്രബ്മീത് സർക്കറിയ അറിയിച്ചു. കിഴക്കൻ ഒൻ്റാരിയോയിലെ 401, 416 ഹൈവേകളുടെ ചില ഭാഗങ്ങളിൽ വെള്ളിയാഴ്ച ഈ മാറ്റങ്ങൾ പ്രാബല്യത്തിൽ വരും. 401, ക്വീൻ എലിസബത്ത് വേ, 402, 403, 416, 417 ഹൈവേകളിൽ സെപ്റ്റംബർ അവസാനത്തോടെയും വേഗപരിധി വർധന നടപ്പിൽ വരും.

2024 ലെ ശരത്കാലത്ത്, സുരക്ഷിതമായ സ്ഥലങ്ങളിൽ വേഗത പരിധി ഉയർത്തുന്നതിനെക്കുറിച്ച് തന്‍റെ സർക്കാർ പരിശോധിക്കുന്നതായി പ്രീമിയർ ഡഗ് ഫോർഡ് അറിയിച്ചിരുന്നു. വേഗത പരിധി ഉയർത്തുന്നതിലൂടെ സാർണിയയിൽ നിന്ന് ടൊറൻ്റോയിലേക്കുള്ള യാത്ര സമയം ഏകദേശം 20 മിനിറ്റ് കുറയും. കൂടാതെ ടൊറൻ്റോ-ഒട്ടാവ യാത്ര സമയം ഏകദേശം അര മണിക്കൂർ ലഭിക്കാമെന്നും സർക്കാർ കണക്കാക്കുന്നു.