കാലിഫോർണിയയിലെ ബോണി ഡൂൺ ബീച്ചിൽ വൻ തിരമാലയിൽപ്പെട്ട് രണ്ടു ഇന്ത്യൻ വംശജരായ വിദ്യാർത്ഥിനികൾ മരിച്ചു. ഹർഷിത നായർ (21), മഹിയാൽ സ്രാൻ (20) എന്നീ സുഹൃത്തുക്കളാണ് കടലിൽ ഒഴുക്കിൽപ്പെട്ട് മരിച്ചത്. കഴിഞ്ഞ ബുധനാഴ്ച വൈകുന്നേരമാണ് അപകടം നടന്നത്. അപകടസാധ്യത കൂടുതലുള്ള ബീച്ചിലെ “കീഹോൾ” എന്ന പാറക്കെട്ടിന് സമീപം ഇരുവരും വിശ്രമിക്കുകയായിരുന്നുവെന്ന് അധികൃതർ അറിയിച്ചു. അതിനിടെ വൻ തിരമാലകളും ശക്തമായ കടൽപ്രവാഹവും ഇവരെ കടലിലേക്ക് വലിച്ചിഴക്കുകയായിരുന്നു.
വൈകിട്ട് അഞ്ചുമണിയോടെ ഒരു ദൃക്സാക്ഷി 911-ൽ വിവരം അറിയിച്ചതിനെ തുടർന്ന് വിവിധ രക്ഷാസേനകളും ഏജൻസികളും ചേർന്ന് വ്യാപകമായ രക്ഷാപ്രവർത്തനം ആരംഭിച്ചു. രക്ഷാപ്രവർത്തകർ ഇരുവരെയും കണ്ടെത്തി കരയിലെത്തിച്ചെങ്കിലും ഗുരുതരാവസ്ഥയിലായിരുന്നു. ഹർഷിത നായരെ ഹെലികോപ്റ്റർ വഴി ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല. മഹിയാൽ സ്രാനെ അതീവ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചെങ്കിലും ശനിയാഴ്ച മരണത്തിന് കീഴടങ്ങി. ഹർഷിത നായർ യൂണിവേഴ്സിറ്റി ഓഫ് കാലിഫോർണിയ ബെർകെലിയിൽ ലീഗൽ സ്റ്റഡീസ് വിദ്യാർത്ഥിനിയായിരുന്നു. മഹിയാൽ സ്രാൻ സാൻ ജോസേ സ്റ്റേറ്റ് യൂണിവേഴ്സിറ്റിയിലെ വിദ്യാർത്ഥിനിയാണ്. ഇരുവരും കാലിഫോർണിയ വാഷിങ്ടൺ ഹൈസ്കൂളിലെ പൂർവവിദ്യാർത്ഥിനികളായിരുന്നു.
