യൂറോപ്യൻ യൂണിയനിൽ (ഇയു) അസോസിയേറ്റ് അംഗമാകാൻ കാനഡയ്ക്ക് യൂറോപ്യൻ കമ്മിഷൻ നൽകിയ ക്ഷണം യുഎസിനോടുള്ള ശത്രുതാപരമായ നീക്കമായാണ് യുഎസ് പ്രസിഡന്റ് ഡോണൾഡ് ട്രംപ് വിലയിരുത്തുന്നത്. ഈ നീക്കത്തിന് പിന്നിലെ ഉദ്ദേശ്യം ശരിയല്ലെങ്കിൽ യൂറോപ്യൻ യൂണിയന്മേൽ കൂടുതൽ തീരുവകൾ ചുമത്തുമെന്നും, ചില പ്രത്യേക മേഖലകളിൽ യൂറോപ്പുമായുള്ള വ്യാപാര ബന്ധം പൂർണ്ണമായി വിച്ഛേദിക്കാൻ യുഎസിന് സാധിക്കുമെന്നും അദ്ദേഹം കർശനമായ മുന്നറിയിപ്പ് നൽകിയിട്ടുണ്ട്.
അതേസമയം, യുഎസുമായുള്ള വ്യാപാര ബന്ധത്തിലുണ്ടായ തകർച്ചയെ തുടർന്ന് പുതിയ വ്യാപാര പങ്കാളികളെ തേടാനുള്ള ശ്രമത്തിലാണ് കാനഡാ പ്രധാനമന്ത്രി മാർക്ക് കാർണി. ഇതിന്റെ ഭാഗമായി യൂറോപ്യൻ പാർലമെന്റിൽ നടത്തിയ പ്രസംഗത്തിലാണ് യൂറോപ്യൻ കമ്മിഷൻ പ്രസിഡന്റ് ഉർസുല വോൺ ഡെർ ലെയൻ കാനഡയ്ക്ക് ഇയുവിൽ അംഗത്വം വാഗ്ദാനം ചെയ്തത്. നിലവിൽ 27 രാജ്യങ്ങളാണ് യൂറോപ്യൻ യൂണിയനിൽ അംഗങ്ങളായിട്ടുള്ളത്.
