ആൽബർട്ടയിലെ ആരോഗ്യമേഖലയ്ക്ക് തിരിച്ചടിയായി എഎച്ച്എസ് മെഡിക്കൽ ഓഫീസറുടെ രാജി. ആൽബർട്ട ഹെൽത്ത് സർവീസസ് (AHS) ചീഫ് മെഡിക്കൽ ഓഫീസറും വൈസ് പ്രസിഡൻ്റുമായ ഡോ. പീറ്റർ ജാമിസൺ പദവി ഒഴിഞ്ഞതോടെ പ്രവിശ്യാ ആരോഗ്യമേഖല കടുത്ത പ്രതിസന്ധിയിലായി.
പ്രവിശ്യാ സർക്കാർ ഡോ. ജാമിസണിന്റെ രാജി സ്ഥിരീകരിച്ചതായി റിപ്പോർട്ടുകൾ സൂചിപ്പിക്കുന്നു. എന്നാൽ അദ്ദേഹം സ്വയം ഒഴിഞ്ഞതാണോ അതോ നീക്കം ചെയ്തതാണോ എന്നത് വ്യക്തമല്ല. 2023 നവംബറിൽ സർക്കാർ പ്രഖ്യാപിച്ച സമഗ്ര ആരോഗ്യ പരിഷ്കരണ നടപടികൾക്ക് ശേഷം എഎച്ച്എസിൻ്റെ ഉന്നതതലത്തിൽ പലതവണ നേതൃമാറ്റങ്ങൾ ഉണ്ടായി. തുടർച്ചയായ ഇത്തരം നേതൃമാറ്റങ്ങൾ പ്രവിശ്യയിലെ ആരോഗ്യരംഗത്തെ പ്രതികൂലമായി ബാധിക്കുന്നതായി കാൽഗറി സർവകലാശാലയിലെ പ്രൊഫസർ ഡോ. ബ്രാഡൻ മാൻസ് ചൂണ്ടിക്കാട്ടി. മുൻനിര മെഡിക്കൽ വിദഗ്ധർ പടിയിറങ്ങുന്നത് ഡോക്ടർമാരുടെയും നഴ്സുമാരുടെയും ആത്മവിശ്വാസം തകർക്കുമെന്ന് ആൽബർട്ട മെഡിക്കൽ അസോസിയേഷൻ പ്രതിനിധി ഡോ. പോൾ പാർക്സ് മുന്നറിയിപ്പ് നൽകി.
