ഫ്ലോറിഡയിലെ ഫോർട്ട് ലോഡർഡെയിലിൽ നടക്കുന്ന 16-ാമത് KCCNA നാഷണൽ കൺവെൻഷന്റെ ഒരുക്കങ്ങൾ അന്തിമഘട്ടത്തിൽ. രജിസ്ട്രേഷൻ 2026 ജൂൺ 6-ന് അവസാനിക്കുമെന്ന് കൺവെൻഷൻ സ്റ്റിയറിംഗ് കമ്മിറ്റി അറിയിച്ചു.
2026 ഓഗസ്റ്റ് 6 മുതൽ 9 വരെ ഫ്ലോറിഡയിലെ ഫോർട്ട് ലോഡർഡെയിലുള്ള ബ്രോവാർഡ് കൗണ്ടി കൺവെൻഷൻ സെന്ററിൽ നടക്കുന്ന 16-ാമത് KCCNA നാഷണൽ കൺവെൻഷൻ, വടക്കേ അമേരിക്കയിലെ ക്നാനായ കത്തോലിക്ക സമൂഹത്തിന്റെ ഏറ്റവും വലിയതും അഭിമാനകരവുമായ സംഗമങ്ങളിലൊന്നായിരിക്കും. KCASF (മയാമി), KCCCF (ടാമ്പാ) യൂണിറ്റുകളുടെ സംയുക്ത ആതിഥേയത്വത്തിലാണ് ഈ മഹാസമ്മേളനം സംഘടിപ്പിക്കുന്നത്. അമേരിക്കയിലെയും കാനഡയിലെയും ആയിരക്കണക്കിന് ക്നാനായ കുടുംബങ്ങൾ ഈ ചരിത്രസംഗമത്തിൽ പങ്കെടുക്കുമെന്ന് KCCNA പ്രസിഡന്റ് ജെയിംസ് ഇല്ലിക്കൽ, ജനറൽ സെക്രട്ടറി വിപിൻ ചാലുങ്കൽ, കൺവെൻഷൻ ചെയർപേഴ്സൺ ജോബി ഊരാളിൽ എന്നിവർ അറിയിച്ചു. കൂടാതെ KCCNAയുടെ പോഷകസംഘടനകളായ വിമൻസ് ഫോറം, ക്നാനായ കാത്തലിക് യൂത്ത് ലീഗ് (KCYL), യുവജനവേദി, ക്നാനായ യംഗ് അഡൾട്സ് (KYA) എന്നിവയുടെ നേതൃത്വത്തിൽ എല്ലാ പ്രായക്കാർക്കും അനുയോജ്യമായ കലാ, സാംസ്കാരിക, സാമൂഹിക പരിപാടികൾ ഒരുക്കും. ഇത്തവണ ഗോൾഫ്, പിക്കിൾബോൾ, 35 വയസിന് മുകളിലുള്ളവർക്കായി 3×3 ബാസ്ക്കറ്റ്ബോൾ മത്സരം എന്നിവ ഉൾപ്പെടെയുള്ള ആകർഷകമായ കായിക പരിപാടികളും കൺവെൻഷന്റെ പ്രത്യേകതയായിരിക്കും.
