ന്യൂയോര്‍ക്ക് സിറ്റി: ന്യൂയോര്‍ക്കിലെ പ്രമുഖ ഷിപ്പ്യാര്‍ഡിലുണ്ടായ വന്‍ തീപിടിത്തത്തിലും തുടര്‍ച്ചയായുണ്ടായ രണ്ട് സ്‌ഫോടനങ്ങളിലും ഒരാള്‍ മരിക്കുകയും 36 പേര്‍ക്ക് പരുക്കേല്‍ക്കുകയും ചെയ്തു. പരുക്കേറ്റവരില്‍ ഭൂരിഭാഗവും രക്ഷാപ്രവര്‍ത്തനത്തിനെത്തിയ ഫയര്‍ഫോഴ്‌സ് ഉദ്യോഗസ്ഥരും മറ്റ് അടിയന്തിര വിഭാഗങ്ങളില്‍ ഉള്ളവരുമാണ്. സംഭവസ്ഥലത്ത് വെച്ച് തന്നെ ഒരു സിവിലിയന്‍ മരണപ്പെട്ടതായി അധികൃതര്‍ സ്ഥിരീകരിച്ചു.
വെള്ളിയാഴ്ച ഉച്ചയ്ക്ക് 3:30 ഓടെയാണ് ഷിപ്പ്യാര്‍ഡിന് പിന്നിലുള്ള കൂറ്റന്‍ ഇരുമ്പ് കെട്ടിടത്തിന്റെ ബേസ്മെന്റില്‍ പുക ഉയര്‍ന്നതായും രണ്ട് തൊഴിലാളികള്‍ കുടുങ്ങിക്കിടക്കുന്നതായും പോലീസിന് വിവരം ലഭിക്കുന്നത്. ആറ് മിനിറ്റിനുള്ളില്‍ തന്നെ അഗ്‌നിശമന സേനാംഗങ്ങളും ഇ.എം.എസ് സംഘവും സ്ഥലത്തെത്തിയെങ്കിലും, തൊട്ടുപിന്നാലെ കെട്ടിടത്തില്‍ ശക്തമായ ആദ്യ സ്‌ഫോടനം ഉണ്ടാകുകയായിരുന്നു. കെട്ടിടത്തിനുള്ളില്‍ കുടുങ്ങിയവര്‍ക്കായി അഞ്ച് ഫയര്‍ഫോഴ്‌സ് ഉദ്യോഗസ്ഥര്‍ തിരച്ചില്‍ നടത്തുന്നതിനിടയിലാണ് രണ്ടാമത്തെ സ്‌ഫോടനം ഉണ്ടായത്.
രണ്ടാമത്തെ സ്‌ഫോടനത്തിന്റെ ആഘാത തരംഗത്തില്‍ കെട്ടിടത്തിനുള്ളില്‍ ഉണ്ടായിരുന്ന ഒരു ഫയര്‍ മാര്‍ഷലിനും ഫയര്‍ഫോഴ്‌സ് ഉദ്യോഗസ്ഥനും ഗുരുതരമായി പരുക്കേറ്റു. തലയോട്ടിക്ക് ഒടിവും മസ്തിഷ്‌കത്തില്‍ ചെറിയ രക്തസ്രാവവുമുള്ള ഫയര്‍ മാര്‍ഷലിന്റെ നില നിലവില്‍ ഗുരുതരമായി തുടരുകയാണ്. അടുത്ത 24 മണിക്കൂര്‍ ഇദ്ദേഹം നിരീക്ഷണത്തിലായിരിക്കുമെന്ന് ചീഫ് മെഡിക്കല്‍ ഓഫീസര്‍ അറിയിച്ചു. പരുക്കേറ്റ രണ്ടാമത്തെ ഫയര്‍ഫോഴ്‌സ് ഉദ്യോഗസ്ഥന്റെ നില തൃപ്തികരമാണ്.
ഇതൊരു സങ്കീര്‍ണ്ണവും അതിവേഗം പടരുന്നതുമായ അടിയന്തിര സാഹചര്യമായിരുന്നുവെന്ന് ന്യൂയോര്‍ക്ക് മേയര്‍ സോഹ്‌റാന്‍ മംദാനി വാര്‍ത്താ സമ്മേളനത്തില്‍ വ്യക്തമാക്കി. വെള്ളിയാഴ്ച രാത്രിയോടെ തീ നിയന്ത്രണവിധേയമാക്കിയെങ്കിലും ഇരുന്നൂറിലധികം അഗ്‌നിശമന സേനാംഗങ്ങള്‍ ഇപ്പോഴും പ്രദേശത്ത് ക്യാമ്പ് ചെയ്യുന്നുണ്ട്. രണ്ടാം ലോകമഹായുദ്ധകാലത്ത് യു.എസ് നാവികസേനയ്ക്കായി കപ്പലുകള്‍ നിര്‍മ്മിച്ചിരുന്ന പ്രശസ്തമായ ബെത്ലഹേം സ്റ്റീല്‍ കമ്പനിയുടെ ഉടമസ്ഥതയിലുള്ളതായിരുന്നു ഈ ഷിപ്പ്യാര്‍ഡ്. തീപിടിത്തത്തിന്റെ യഥാര്‍ത്ഥ കാരണം കണ്ടെത്താന്‍ സമഗ്രമായ അന്വേഷണം ഉടന്‍ ആരംഭിക്കുമെന്നും അധികൃതര്‍ അറിയിച്ചു.
