കാനഡ: കാനഡയിലെ ആയിരക്കണക്കിന് മൈക്രോസോഫ്റ്റ് ഔട്ട്ലുക്ക് ഉപയോക്താക്കൾക്ക് തിങ്കളാഴ്ച ഇമെയിൽ സേവനങ്ങൾ തടസ്സപ്പെട്ടതായി റിപ്പോർട്ട്. അക്കൗണ്ടുകളിലേക്ക് ലോഗിൻ ചെയ്യാനും ഇമെയിലുകൾ അയക്കാനും സാധിക്കുന്നില്ലെന്ന് ചൂണ്ടിക്കാട്ടി ടൊറന്റോ, ഒട്ടാവ, മോൺട്രിയൽ എന്നിവിടങ്ങളിൽ നിന്നുള്ള ഉപയോക്താക്കളാണ് പ്രധാനമായും പരാതിപ്പെട്ടത്. ഔട്ടേജ് ട്രാക്കിംഗ് വെബ്സൈറ്റായ ‘ഡൗൺ ഡിറ്റക്ടർ’ പ്രകാരം തിങ്കളാഴ്ച പുലർച്ചെ അഞ്ച് മണിയോടെയാണ് പ്രശ്നങ്ങൾ ആരംഭിച്ചത്.
ഐ.ഒ.എസ് ഉപയോക്താക്കൾ ഔട്ട്ലുക്ക്, ഹോട്ട്മെയിൽ അക്കൗണ്ടുകൾ ഉപയോഗിച്ച് ലോഗിൻ ചെയ്യുമ്പോൾ അനുഭവപ്പെട്ട സാങ്കേതിക തകരാറാണ് ഇതിന് കാരണമെന്ന് മൈക്രോസോഫ്റ്റ് വക്താവ് അറിയിച്ചു. ആപ്പിളിന്റെ ഡിഫോൾട്ട് മെയിൽ ആപ്പ് ഉപയോഗിക്കുന്നവർക്കാണ് പ്രധാനമായും ഈ പ്രശ്നം നേരിട്ടത്. എന്നാൽ നിലവിൽ ഈ പ്രശ്നം പരിഹരിച്ചതായും ഉപയോക്താക്കൾക്ക് സാധാരണ നിലയിൽ സേവനം ലഭ്യമാകുമെന്നും കമ്പനി വ്യക്തമാക്കി. തടസ്സം നേരിട്ടവർ മൈക്രോസോഫ്റ്റിന്റെ ‘സർവീസ് ഹെൽത്ത് സ്റ്റാറ്റസ്’ പേജിലെ നിർദ്ദേശങ്ങൾ പാലിക്കണമെന്നും കമ്പനി അറിയിച്ചു.
മൈക്രോസോഫ്റ്റ് 365 സ്റ്റാറ്റസ് പേജിലൂടെയും കമ്പനി ഈ വിവരം പങ്കുവെച്ചിട്ടുണ്ട്. കഴിഞ്ഞ 24 മണിക്കൂറിനിടെ കാനഡയുടെ വിവിധ ഭാഗങ്ങളിൽ നിന്ന് മുന്നൂറോളം ഔദ്യോഗിക റിപ്പോർട്ടുകൾ ഇമെയിൽ തടസ്സത്തെക്കുറിച്ച് ലഭിച്ചിരുന്നു. ഓഫീസ് ജോലികൾക്കും വ്യക്തിപരമായ ആവശ്യങ്ങൾക്കും ഔട്ട്ലുക്കിനെ ആശ്രയിക്കുന്ന നിരവധി പേരെ ഈ സേവന തടസ്സം ബാധിച്ചു. നിലവിൽ സർവീസ് പൂർവ്വസ്ഥിതിയിലായതായും റിപ്പോർട്ടുകൾ സൂചിപ്പിക്കുന്നു.
