കാനഡയിൽ നിരോധിത തോക്കുകൾ തിരികെ വാങ്ങി ഉടമകൾക്ക് നഷ്ടപരിഹാരം നൽകുന്ന ഫെഡറൽ സർക്കാർ ഗൺ ബൈ ബാക്ക് പദ്ധതിയിൽ ഹാലിഫാക്സ് റീജിനൽ പൊലീസും പങ്കുചേർന്നു. ഇതിനോടകം തന്നെ ഏകദേശം 2,500 തരം തോക്കുകൾക്കാണ് കാനഡയിൽ നിരോധനം ഏർപ്പെടുത്തിയിരിക്കുന്നത്. 2020 മെയ് മുതൽ നിരോധിച്ച ‘അസൾട്ട് സ്റ്റൈൽ’ തോക്കുകൾ ഉടമകളിൽ നിന്ന് ശേഖരിക്കുക എന്നതാണ് പദ്ധതിയുടെ ലക്ഷ്യം. 2026 ഒക്ടോബർ 30 മുതൽ ഇത്തരം തോക്കുകൾ കൈവശം വെക്കുന്നത് നിയമവിരുദ്ധമാണെന്ന് ഹാലിഫാക്സ് പൊലീസ് ചീഫ് ഡോൺ മക്ലീൻ അറിയിച്ചു. തോക്ക് ഉടമകളെ ക്രിമിനലുകളായി കാണാനല്ല, മറിച്ച് പുതിയ ഫെഡറൽ നിയമങ്ങൾ പാലിക്കാൻ അവരെ പിന്തുണയ്ക്കാനാണ് ഈ പദ്ധതിയെന്ന് അദ്ദേഹം വ്യക്തമാക്കി.
സമൂഹത്തിൽ തോക്കുകളുടെ സാന്നിധ്യം കുറയുന്നത് ഹാലിഫാക്സിന് ഗുണകരമാകുമെന്ന് മക്ലീൻ പറഞ്ഞു. നോവസ്കോഷയിലെ ഗാർഹിക പീഡനങ്ങളും സമാനമായ അക്രമ സംഭവങ്ങളും കണക്കിലെടുക്കുമ്പോൾ, തോക്കുകൾ കുറയ്ക്കുന്നതിനുള്ള ഏത് നീക്കത്തെയും പിന്തുണയ്ക്കേണ്ടത് തന്റെ കടമയാണെന്നും അദ്ദേഹം കൂട്ടിച്ചേർത്തു. യുദ്ധമുഖങ്ങളിൽ മാത്രം ഉപയോഗിക്കാൻ രൂപകൽപ്പന ചെയ്ത എ.ആർ-15 (AR-15) ഉൾപ്പെടെയുള്ള തോക്കുകൾക്ക് നമ്മുടെ സമൂഹത്തിൽ സ്ഥാനമില്ലെന്ന് പബ്ലിക് സേഫ്റ്റി മിനിസ്റ്റർ ഗാരി ആനന്ദസംഗരിയും വ്യക്തമാക്കി.
ഈ പദ്ധതിയിൽ പങ്കുചേരാൻ ആഗ്രഹിക്കുന്നവർ 2026 മാർച്ച് 31-നകം തങ്ങളുടെ താൽപ്പര്യം അറിയിക്കണം. അപേക്ഷകൾ അംഗീകരിക്കപ്പെട്ടാൽ ആർ.സി.എം.പി, പ്രാദേശിക പൊലീസ് അല്ലെങ്കിൽ മൊബൈൽ കളക്ഷൻ യൂണിറ്റുകൾ എന്നിവ വഴി തോക്കുകൾ കൈമാറാൻ സാധിക്കും. ഒക്ടോബർ 30-ന് ശേഷം ഇത്തരം തോക്കുകൾ കൈവശം വെക്കുന്നവർക്കെതിരെ ക്രിമിനൽ നടപടികൾ സ്വീകരിക്കുമെന്ന് സർക്കാർ മുന്നറിയിപ്പ് നൽകി.
