ജ്വല്ലറിയിൽ നിന്ന് ലക്ഷക്കണക്കിന് രൂപയുടെ വജ്രാഭരണങ്ങൾ മോഷണം പോയ സംഭവത്തിൽ വില്ലനായെത്തിയത് ഒരു എലി! ഷട്ടറുകൾ പൂട്ടി സുരക്ഷിതമാക്കിയ കടയിൽ നിന്ന് ആഭരണങ്ങൾ മാഞ്ഞുപോയത് കണ്ട് അമ്പരന്ന ഉടമകൾക്ക് സിസിടിവി ദൃശ്യങ്ങളാണ് ഒടുവിൽ സത്യം വെളിപ്പെടുത്തിയത്.
ആരും അകത്തുകടന്ന ലക്ഷണങ്ങളൊന്നുമില്ലാതിരുന്നിട്ടും 10 ലക്ഷം രൂപയോളം വിലമതിക്കുന്ന വജ്രാഭരണങ്ങളും തങ്കമാലകളും മോതിരങ്ങളും കാണാതായതോടെയാണ് കടയുടമ സിസിടിവി പരിശോധിച്ചത്. റാക്കിൽ സൂക്ഷിച്ചിരുന്ന ആഭരണങ്ങൾ എലി നൈസായി മാളത്തിലേക്ക് വലിച്ചിഴച്ച് കൊണ്ടുപോകുന്ന ദൃശ്യങ്ങൾ കണ്ട് ജീവനക്കാരും കടയുടമയും ഒരുപോലെ ഞെട്ടി!
തുടർന്ന് സിസിടിവി ദൃശ്യങ്ങളുടെ അടിസ്ഥാനത്തിൽ നടത്തിയ പരിശോധനയിൽ, എലിയുടെ മാളം തുരന്ന് നഷ്ടപ്പെട്ട മുഴുവൻ ആഭരണങ്ങളും കടയുടമകൾ വീണ്ടെടുത്തു. എലിയുടെ ഈ അപൂർവ്വ ‘മോഷ്ടാവിന്റെ’ കഥയും സിസിടിവി ദൃശ്യങ്ങളും ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.
