G7 രാജ്യങ്ങളിലെ വ്യവസായ, ഡിജിറ്റൽ മന്ത്രിമാരുടെ യോഗം ഈ ആഴ്ച മോൺട്രിയലിൽ നടക്കും. യോഗത്തിൻ്റെ പ്രധാന അജണ്ട ആർട്ടിഫിഷ്യൽ ഇൻ്റലിജൻസ് (എഐ) ആയിരിക്കുമെന്ന് റിപ്പോർട്ടുകൾ സൂചിപ്പിക്കുന്നു. കാനഡയ്ക്ക് ഈ വർഷം G7 അധ്യക്ഷ സ്ഥാനം ലഭിച്ചതിൻ്റെ ഭാഗമായാണ് ഈ ദ്വിദിന സമ്മേളനം. എഐ അടക്കമുള്ള സാങ്കേതികവിദ്യകൾ അതിവേഗം വളരുന്ന സാഹചര്യത്തിൽ, രാജ്യങ്ങൾ തമ്മിലുള്ള സഹകരണവും ഏകോപനവും അത്യന്താപേക്ഷിതമാണെന്ന് വിദഗ്ധർ അഭിപ്രായപ്പെട്ടു.

ഡിജിറ്റൽ സാങ്കേതികവിദ്യ, സാമ്പത്തിക മത്സരശേഷി പോലുള്ള വലിയ വിഷയങ്ങളുമായി ബന്ധപ്പെട്ടിരിക്കുന്നതിനാൽ, യോ​ഗത്തിലെ ചർച്ച പകുതി സമയവും എഐ വിഷയങ്ങൾക്കായിരിക്കും പ്രാധാന്യം നൽകുക. എഐ നിയന്ത്രണങ്ങൾ ശക്തമാക്കാൻ ശ്രമിക്കുന്ന യൂറോപ്യൻ യൂണിയനും (EU), നിയന്ത്രണങ്ങളെ എതിർക്കുന്ന അമേരിക്കയും തമ്മിൽ സമന്വയമുണ്ടാക്കാൻ കാനഡക്ക് ഈ യോഗത്തിലൂടെ സാധിക്കും. പൊതുസേവനങ്ങളിലും ചെറുകിട വ്യാപാരങ്ങളിലും എഐ ഉപയോഗം വർധിപ്പിക്കാൻ G7 രാജ്യങ്ങൾ പ്രതിജ്ഞാബദ്ധരാണ്. എഐ സാങ്കേതികവിദ്യകളുടെ പരസ്പര പ്രവർത്തനക്ഷമത ഉറപ്പാക്കാനുള്ള മാനദണ്ഡങ്ങൾ നിശ്ചയിക്കുന്നതിൽ കാനഡക്ക് പ്രധാന പങ്ക് വഹിക്കാൻ കഴിയുമെന്നും വിദഗ്ധർ ചൂണ്ടിക്കാട്ടി.