കഴിഞ്ഞ നാല് പതിറ്റാണ്ടുകളായി അമ്പരപ്പിക്കുന്ന നൃത്തച്ചുവടുകളിലൂടെയും മികച്ച സംവിധാന ശൈലിയിലൂടെയും ഇന്ത്യൻ ചലച്ചിത്ര ലോകത്ത് തിളങ്ങിനിൽക്കുന്ന പ്രഭുദേവയുടെ വാഹനശേഖരത്തിലേക്ക് ഇനി പുതിയൊരു ആഡംബര അതിഥികൂടി. എംജി സെലക്ടിന്റെ അത്യാധുനിക പ്രീമിയം മോഡലായ ‘എംജി എം9 – പ്രസിഡൻഷ്യൽ ലിമോസിൻ’ ആണ് താരം പുതുതായി സ്വന്തമാക്കിയത്. ചെന്നൈയിലുള്ള അദ്ദേഹത്തിന്റെ വസതിയിലെത്തിച്ചാണ് ഔദ്യോഗികമായി വാഹനത്തിന്റെ കീ കൈമാറിയത്. അഭിനയം, നൃത്തസംവിധാനം, നിർമ്മാണം തുടങ്ങി കൈവെച്ച മേഖലകളിലെല്ലാം തന്റേതായ വ്യക്തിമുദ്ര പതിപ്പിച്ച പ്രഭുദേവയുടെ സജീവവും വേഗതയേറിയതുമായ ജീവിതശൈലിക്ക് എല്ലാവിധത്തിലും അനുയോജ്യമായ ഒന്നാണ് ഈ ഫ്ലാഗ്ഷിപ്പ് മോഡൽ. ദീർഘദൂര യാത്രകളിൽ പരമാവധി ആഡംബരവും സുഖസൗകര്യങ്ങളും ആഗ്രഹിക്കുന്നവർക്കായി പ്രത്യേകമായി രൂപകൽപ്പന ചെയ്തതാണ് ഈ വാഹനം.
പ്രഭുദേവയുടെ നൃത്തത്തിലെ കൃത്യതയെ ഓർമ്മിപ്പിക്കുന്ന തരത്തിലാണ് ഇതിന്റെ ഉള്ളിലെ ‘പ്രസിഡൻഷ്യൽ സീറ്റുകൾ’ സജ്ജീകരിച്ചിരിക്കുന്നത്. യാത്രികരുടെ സൗകര്യത്തിനനുസരിച്ച് 16 രീതികളിൽ മാറ്റിയെടുക്കാവുന്ന ഈ സീറ്റുകളിൽ 8 മസാജ് ഓപ്ഷനുകൾ, ഹീറ്റിംഗ്, വെന്റിലേഷൻ എന്നിവ ഉൾപ്പെടുത്തിയിട്ടുണ്ട്. കോന്യാക് ബ്രൗൺ ലെതർ ഇന്റീരിയർ, ആംറെസ്റ്റിൽ തന്നെയുള്ള ഇന്റലിജന്റ് കൺട്രോളുകൾ, യാറ്റ് സ്റ്റൈലിലുള്ള ഡ്യുവൽ സൺറൂഫ്, മനോഹരമായ ആംബിയന്റ് ലൈറ്റിങ് എന്നിവ യാത്ര കൂടുതൽ ആസ്വാദ്യകരമാക്കുന്നു. 13 സ്പീക്കറുകൾ അടങ്ങിയ പ്രീമിയം ഓഡിയോ സിസ്റ്റവും ഈ വാഹനത്തിലുണ്ട്. പേൾ ലസ്റ്റർ വൈറ്റ്, മെറ്റൽ ബ്ലാക്ക്, കോൺക്രീറ്റ് ഗ്രേ എന്നീ മൂന്ന് ആകർഷകമായ നിറങ്ങളിൽ ലഭ്യമായ ഈ ലിമോസിന്, ബോൾഡ് ട്രാപെസോയ്ഡൽ ഗ്രിൽ, സ്പ്ലിറ്റ് എൽഇഡി ഹെഡ്ലാമ്പുകൾ, വാട്ടർഫാൾ സ്റ്റൈൽ ടെയിൽ ലൈറ്റുകൾ, 19 ഇഞ്ച് കോൺവെക്സ് ടയറുകൾ എന്നിവയിലൂടെ മികച്ചൊരു മസ്കുലർ ലുക്ക് ലഭിക്കുന്നു.
സുരക്ഷയുടെ കാര്യത്തിലും എംജി എം9 ഒട്ടും പിന്നിലല്ല. ഉയർന്ന നിലവാരമുള്ള സ്റ്റീൽ ബോഡിയിൽ നിർമ്മിച്ച ഈ വാഹനത്തിന് യൂറോ എൻകാപിൽ നിന്നും ആൻകാപിൽ നിന്നും 5-സ്റ്റാർ സുരക്ഷാ റേറ്റിങ് ലഭിച്ചിട്ടുണ്ട്. 7 എയർബാഗുകൾ, ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (ADAS) എന്നിവ സുരക്ഷിതമായ യാത്ര ഉറപ്പാക്കുന്നു. 245 പിഎസ് കരുത്തും 350 എൻഎം ടോർക്കും പുറത്തെടുക്കുന്ന ഇതിന്റെ എഞ്ചിൻ മികച്ച റോഡ് പെർഫോമൻസാണ് കാഴ്ചവെയ്ക്കുന്നത്. നിലവിൽ 13 ഭാഷകളിൽ ഒരേസമയം റിലീസ് ചെയ്യാനൊരുങ്ങുന്ന ഒരു വമ്പൻ ഫാന്റസി ചിത്രത്തിന് പുറമെ തമിഴ്, തെലുങ്ക് ഭാഷകളിലായി നിരവധി പ്രൊജക്ടുകളുടെ തിരക്കിലാണ് പ്രഭുദേവയിപ്പോൾ.
