എഡ്മണ്ടൻ: നഗരത്തിലെ ഗുണ്ടാസംഘങ്ങളെക്കുറിച്ച് അപൂർവ വിവരങ്ങൾ പങ്കുവെച്ച് എഡ്മണ്ടൻ പൊലീസ്. ഡൗൺടൗൺ ഗ്രൂപ്പുകൾക്കായുള്ള ഒരു പ്രസൻ്റേഷനിൽ വെച്ചാണ് പോലീസ് ആൽബെർട്ടയുടെ തലസ്ഥാന നഗരത്തിലെ ഗുണ്ടാ പ്രവർത്തനങ്ങളെക്കുറിച്ചുള്ള വ്യക്തമായ വിവരങ്ങൾ നൽകിയത്. എഡ്മണ്ടൺ പ്രദേശത്ത് ഗുണ്ടാസംഘങ്ങളിലും സംഘടിത കുറ്റകൃത്യങ്ങളിലും ഏർപ്പെടുന്നവരായി ഏകദേശം മൂവായിരത്തോളം പേരുള്ളതായി പോലീസ് കണക്കാക്കുന്നു. കൊലപാതകങ്ങളിൽ നാലിലൊന്നും ഈ ഗ്രൂപ്പുകളുമായി ബന്ധപ്പെട്ടിരിക്കുന്നുവെന്ന് പൊലീസ് അറിയിച്ചു.
എഡ്മണ്ടൺ ഉൾപ്പെടെ പത്ത് ലക്ഷത്തിലധികം ആളുകളുള്ള നഗരങ്ങളിൽ ഗുണ്ടാ പ്രവർത്തനം സാധാരണമാണ് എന്നും പോലീസ് വ്യക്തമാക്കി. പൊതുജനങ്ങളെ വിവരങ്ങൾ അറിയാൻ സഹായിക്കുന്നതിനൊപ്പം സംശയാസ്പദമായ പ്രവർത്തനങ്ങൾ പോലീസിൽ റിപ്പോർട്ട് ചെയ്യാൻ അവരെ സഹായിക്കുന്നതിനും വേണ്ടിയായിരുന്നു പ്രസൻ്റേഷൻ. ആളുകൾ അവരുടെ ചുറ്റുപാടുകളെക്കുറിച്ച് ബോധവാന്മാരായിരിക്കേണ്ടതിൻ്റെ ആവശ്യകതയെക്കുറിച്ചാണ് സംസാരിച്ചതെന്ന് ഡൗൺടൗൺ ഗ്രൂപ്പുകൾക്കായുള്ള പ്രസൻ്റേഷനിടെ ഇപിഎസ് സാർജൻ്റ് റയാൻ ഫെറി പറഞ്ഞു. ഗുണ്ടാസംഘങ്ങളെക്കുറിച്ചുള്ള ചില വിവരങ്ങൾ പങ്കുവയ്ക്കുന്നത് പൊതുജനങ്ങൾക്ക് പ്രശ്നങ്ങൾ റിപ്പോർട്ട് ചെയ്യുന്നതിനുള്ള ആത്മവിശ്വാസം നൽകുമെന്നും പോലീസ് പറഞ്ഞു.
