കാൽഗറി: നിരവധി ഹാർഡ്വെയർ സ്റ്റോറുകളിൽ നിന്ന് മോഷണം നടത്തിയെന്ന ആരോപണത്തെ തുടർന്ന് കാൽഗറി പോലീസ് ഉദ്യോഗസ്ഥൻ പിടിയിലായി. ഓഗസ്റ്റ് 26ന് 52 വയസ്സുള്ള കോൺസ്റ്റബിൾ ബ്രാഡ്ലി ടെപ്പർ എന്ന ഉദ്യോഗസ്ഥനാണ് അറസ്റ്റിലായത്. ഇയാൾക്കെതിരെ മോഷണക്കുറ്റം, വഞ്ചനാക്കുറ്റം തുടങ്ങിയവ ചുമത്തിയതായി പോലീസ് അറിയിച്ചു. പോലീസ് സേനയിൽ 20 വർഷമായി സേവനമനുഷ്ഠിക്കുന്നയാളാണ് ബ്രാഡ്ലി ടെപ്പർ.
കാൽഗറിയിലെയും പരിസരപ്രദേശങ്ങളിലെയും സ്റ്റോറുകളിൽ നിന്ന് തട്ടിപ്പിലൂടെ മോഷണം നടത്തിയെന്നാണ് ടെപ്പർക്കെതിരെയുള്ള ആരോപണം. 12 മാസത്തിനുള്ളിൽ 10,000 ഡോളറിലധികം വില വരുന്ന വസ്തുക്കൾ ഇയാൾ മോഷ്ടിച്ചതായാണ് റിപ്പോർട്ട്. ഓഗസ്റ്റ് ആദ്യം മുതൽ ഇയാൾക്കെതിരെ പരാതികൾ റിപ്പോർട്ട് ചെയ്തിരുന്നു. തുടർന്ന് നടത്തിയ അന്വേഷണത്തിലാണ് ഇയാൾക്കെതിരെ കുറ്റം ചുമത്തിയിരിക്കുന്നത്. കൂടാതെ സേനയിലെ ചുമതലകളിൽ നിന്നും ഇയാളെ ഒഴിവാക്കിയതായും അധികൃതർ അറിയിച്ചു.
