ഒട്ടാവ : കാനഡ-അമേരിക്ക ഉഭയകക്ഷി നയതന്ത്ര ബന്ധം ചരിത്രത്തിലെ ഏറ്റവും വലിയ തകർച്ചയെ അഭിമുഖീകരിക്കുന്നതായി റിപ്പോർട്ട്. ആഗോള ഭൗമരാഷ്ട്രീയ മാറ്റങ്ങളെയും അവയുണ്ടാക്കുന്ന സാമ്പത്തിക പ്രത്യാഘാതങ്ങളെയും കുറിച്ച് പഠിക്കുന്ന പ്രമുഖ നിരീക്ഷണ ഏജൻസിയായ (Political Risk Consultancy) യുറേഷ്യ ഗ്രൂപ്പാണ് കാനഡയ്ക്ക് കടുത്ത മുന്നറിയിപ്പ് നൽകിയത്. 2026-ൽ അമേരിക്കയിലെ രാഷ്ട്രീയ അനിശ്ചിതത്വം ഏറ്റവും മാരകമായി ബാധിക്കുന്ന രാജ്യം കാനഡയായിരിക്കുമെന്ന് ഏജൻസിയുടെ വാർഷിക വിശകലന റിപ്പോർട്ട് വ്യക്തമാക്കുന്നു. സുരക്ഷാ-വാണിജ്യ കരാറുകൾ (USMCA) അനിശ്ചിതത്വത്തിലായതോടെ കാനഡയുടെ പരമാധികാരവും സാമ്പത്തിക സ്വയംഭരണവും നേരിട്ടുള്ള വെല്ലുവിളിയാണ് നേരിടുന്നത്.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഏകപക്ഷീയമായ തീരുമാനങ്ങളും അധികാര വിനിയോഗ ശൈലിയും കാനഡയുടെ സാമ്പത്തിക ഭദ്രതയെ അടിമുടി ഉലയ്ക്കുന്നതാണ്. കാനഡയെ യുഎസിന്റെ ഭാഗമാക്കുമെന്ന ട്രംപിന്റെ പ്രകോപനപരമായ പ്രസ്താവനകളും, വാണിജ്യ മേഖലയിൽ കടുത്ത നിയന്ത്രണങ്ങൾ ഏർപ്പെടുത്താനുള്ള നീക്കങ്ങളും ഇരുരാജ്യങ്ങളും തമ്മിലുള്ള വിശ്വാസ്യതയെ സാരമായി ബാധിച്ചു.
അമേരിക്കൻ ഭരണയന്ത്രത്തെ രാഷ്ട്രീയ എതിരാളികൾക്കെതിരെയുള്ള ആയുധമാക്കാനുള്ള ട്രംപിന്റെ നീക്കങ്ങൾ അയൽരാജ്യവുമായുള്ള സമാധാനപരമായ സഹവർത്തിത്വത്തെ പ്രതികൂലമായി ബാധിച്ചു. വാഷിംഗ്ടണെ അമിതമായി ആശ്രയിക്കുന്ന ഒട്ടാവയുടെ നിലവിലെ നയം അപകടകരമാണെന്നും, ഈ രാഷ്ട്രീയ പ്രതിസന്ധിയെ മറികടക്കാൻ ബദൽ വിപണികളെ കണ്ടെത്തുക കാനഡയ്ക്ക് ശ്രമകരമാകുമെന്നും റിപ്പോർട്ട് നിരീക്ഷിക്കുന്നു. വരാനിരിക്കുന്ന മാസങ്ങൾ കാനഡയുടെ നയതന്ത്ര ചരിത്രത്തിലെ ഏറ്റവും വലിയ പരീക്ഷണകാലമായിരിക്കുമെന്നാണ് രാഷ്ട്രീയ കേന്ദ്രങ്ങളുടെ വിലയിരുത്തൽ.
