വാഷിംഗ്ടൺ/പാരിസ് : അമേരിക്കൻ പ്രസിഡന്റ് ഡൊണാൾഡ് ട്രംപും ഫ്രഞ്ച് പ്രസിഡന്റ് ഇമ്മാനുവൽ മാക്രോണും തമ്മിലുള്ള നയതന്ത്ര തർക്കം പുതിയ തലത്തിലേക്ക്. പാരിസിൽ നടക്കാനിരിക്കുന്ന ജി7 (G7) ഉച്ചകോടിയിലേക്കുള്ള മാക്രോണിന്റെ ഔദ്യോഗിക ക്ഷണം ട്രംപ് പരസ്യമായി നിരസിച്ചു.
മാക്രോണിന്റെ രാഷ്ട്രീയ ആയുസ്സ് അവസാനിച്ചുവെന്നും അദ്ദേഹം ഉടൻ തന്നെ അധികാരത്തിൽ നിന്ന് പുറത്താകുമെന്നും ട്രംപ് പരിഹസിച്ചു. ഗ്രീൻലൻഡ് വിഷയത്തിലും വ്യാപാര നികുതികളെ ചൊല്ലിയും ഇരുരാജ്യങ്ങളും തമ്മിലുള്ള ബന്ധം വഷളായ പശ്ചാത്തലത്തിലാണ് ട്രംപിന്റെ ഈ കടുത്ത നീക്കം.
ഈ വ്യാഴാഴ്ച പാരിസിൽ അടിയന്തര ജി7 യോഗം ചേരാനായിരുന്നു മാക്രോണിന്റെ പദ്ധതി. എന്നാൽ, അത്തരമൊരു യോഗത്തിന് ഇനി പ്രസക്തിയില്ലെന്ന നിലപാടിലാണ് വൈറ്റ് ഹൗസ്. “അദ്ദേഹത്തിന് അവിടെ ഇനി നിലനിൽപ്പില്ല” (There’s no longevity there) എന്ന് വാർത്താസമ്മേളനത്തിൽ പറഞ്ഞ ട്രംപ്, ഫ്രഞ്ച് ഭരണകൂടത്തിന്റെ രാഷ്ട്രീയ ഭാവി ചോദ്യം ചെയ്യുകയും ചെയ്തു.
ഫ്രഞ്ച് ഉൽപ്പന്നങ്ങളായ വൈനിനും ഷാംപെയ്നിനും മേൽ 200 ശതമാനം അധിക നികുതി ചുമത്തുമെന്ന ട്രംപിന്റെ മുന്നറിയിപ്പിന് പിന്നാലെയാണ് ഇരുനേതാക്കളും തമ്മിലുള്ള വാക്പോര് രൂക്ഷമായത്.
ഗ്രീൻലൻഡിനെ അമേരിക്കയുടെ ഭാഗമാക്കാനുള്ള ട്രംപിന്റെ നീക്കങ്ങളെ മാക്രോൺ ശക്തമായി എതിർത്തതാണ് പുതിയ തർക്കങ്ങൾക്ക് ആധാരം. യൂറോപ്യൻ രാജ്യങ്ങളുടെ പരമാധികാരത്തിന്മേലുള്ള കടന്നുകയറ്റമാണിതെന്ന മാക്രോണിന്റെ പ്രസ്താവന ട്രംപിനെ ചൊടിപ്പിച്ചിരുന്നു. കൂടാതെ, ട്രംപ് രൂപീകരിച്ച ‘ബോർഡ് ഓഫ് പീസ്’ (Board of Peace) സമിതിയിൽ ചേരാൻ ഫ്രാൻസ് വിസമ്മതിച്ചതും പോരിന് ആക്കം കൂട്ടി.
അതേസമയം, ട്രംപിന്റെ പ്രസ്താവനകൾക്കെതിരെ ഫ്രാൻസിൽ പ്രതിഷേധം ശക്തമാണ്. സഖ്യകക്ഷികൾക്കിടയിലെ മര്യാദകൾ ലംഘിക്കുന്നതാണ് ട്രംപിന്റെ ഇടപെടലുകളെന്ന് ഫ്രഞ്ച് നയതന്ത്ര വൃത്തങ്ങൾ പ്രതികരിച്ചു.
മാക്രോണിന്റെ ജനപ്രീതി കുറയുന്ന സാഹചര്യം മുതലെടുത്ത് യൂറോപ്പിൽ സമ്മർദ്ദം ചെലുത്താനാണ് ട്രംപ് ശ്രമിക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. വരും ദിവസങ്ങളിൽ യൂറോപ്യൻ യൂണിയനും അമേരിക്കയും തമ്മിലുള്ള വ്യാപാര യുദ്ധം കൂടുതൽ രൂക്ഷമാകാനാണ് സാധ്യത.
