ആൽബർട്ടയിൽ പൊതുതിരഞ്ഞെടുപ്പ് അടുത്തിരിക്കെ, വോട്ടെണ്ണൽ പ്രക്രിയകൾ വേഗത്തിലാക്കുന്നതിനായി താല്ക്കാലിക ജീവനക്കാരെ അടിയന്തരമായി റിക്രൂട്ട് ചെയ്യാൻ ഒരുങ്ങി ഇലക്ഷൻസ് ആൽബർട്ട. ഒക്ടോബറിൽ നടക്കാനിരിക്കുന്ന തിരഞ്ഞെടുപ്പിൽ വോട്ടെണ്ണൽ യന്ത്രങ്ങൾക്ക് പകരം പേപ്പർ ബാലറ്റുകൾ കൈകൊണ്ട് എണ്ണാൻ തീരുമാനിച്ച പശ്ചാത്തലത്തിലാണ് ഈ നടപടി. കഴിഞ്ഞ വർഷം പാസാക്കിയ പുതിയ നിയമപ്രകാരം വോട്ടെണ്ണൽ പൂർണ്ണമായും മാനുവൽ ആയിരിക്കണം. അതിനാൽ, മുൻകാലങ്ങളെ അപേക്ഷിച്ച് പതിനായിരക്കണക്കിന് അധിക ജീവനക്കാരുടെ സേവനം ഇത്തവണ ആവശ്യമായി വരും.
പ്രവിശ്യയിലുടനീളമുള്ള വിവിധ വോട്ടെണ്ണൽ കേന്ദ്രങ്ങളിലേക്ക് ആവശ്യമായ ഉദ്യോഗാർത്ഥികളെ കണ്ടെത്തുക എന്നത് ഇലക്ഷൻസ് ആൽബർട്ടയ്ക്ക് വലിയൊരു വെല്ലുവിളിയാണ്. തിരഞ്ഞെടുപ്പ് സുതാര്യവും കൃത്യവുമാക്കുന്നതിൻ്റെ ഭാഗമായി ജനകീയ പങ്കാളിത്തമാണ് കമ്മീഷൻ ലക്ഷ്യമിടുന്നത്. താല്പര്യമുള്ള ആൽബർട്ട നിവാസികൾക്ക് ഇലക്ഷൻസ് ആൽബർട്ടയുടെ ഔദ്യോഗിക വെബ്‌സൈറ്റ് വഴി അപേക്ഷിക്കാവുന്നതാണെന്ന് അധികൃതർ അറിയിച്ചു. കാനഡയിൽ പൊതുവെ തൊഴിൽക്ഷാമം നേരിടുന്ന ഈ സാഹചര്യത്തിൽ, ഇത്രയും വലിയൊരു താല്ക്കാലിക ജീവനക്കാരെ ചുരുങ്ങിയ സമയത്തിനുള്ളിൽ കണ്ടെത്തുക എന്ന ദൗത്യം തിരഞ്ഞെടുപ്പ് അന്തിമഫലം വൈകുന്നതിലേക്ക് നയിക്കുമോ എന്ന ആശങ്കയും രാഷ്ട്രീയ നിരീക്ഷകർക്കുണ്ട്.
