കാനഡയിലെ ഏറ്റവും വലിയ നഗരമായ ടൊറൻ്റോയിലെ വോട്ടർമാർ ഒലീവിയ ചൗവിനെ വീണ്ടും മേയറായി തിരഞ്ഞെടുത്തു. പ്രധാന എതിരാളിയായ ബ്രാഡ് ബ്രാഡ്‌ഫോർഡിനെയും മറ്റ് 50 മേയർ സ്ഥാനാർത്ഥികളെയും പിന്തള്ളി ഒലീവിയ ചൗ മുന്നിലെത്തിയതായി തിങ്കളാഴ്ച നടന്ന മുനിസിപ്പൽ തിരഞ്ഞെടുപ്പിലെ അനൗദ്യോഗിക ഫലങ്ങൾ സൂചിപ്പിക്കുന്നു. 98.2% പോളിങ് ബൂത്തുകളിൽ നിന്നുള്ള വിവരങ്ങൾ ലഭ്യമായപ്പോൾ, ഒലീവിയ ചൗ 54.1 ശതമാനം വോട്ടുകൾ നേടിയപ്പോൾ പ്രധാന എതിരാളി ബ്രാഡ് ബ്രാഡ്‌ഫോർഡിന് 41.1% വോട്ടുകൾ മാത്രമാണ് സ്വന്തമാക്കാനായത്.
മിസ്സിസാഗ മേയർ സ്ഥാനത്തേക്കുള്ള മത്സരത്തിൽ, നിലവിലെ മേയർ കാരൊലിൻ പാരിഷിനെ പരാജയപ്പെടുത്തി ആൽവിൻ ടെഡ്ജോ വിജയിച്ചു. ഏകദേശം 97% പോളിങ് ബൂത്തുകളിൽ നിന്നുള്ള വിവരങ്ങൾ ലഭ്യമായപ്പോൾ, കാരൊലിൻ പാരിഷിനേക്കാൾ 21,000-ത്തിലധികം വോട്ടുകൾക്ക് ടെഡ്ജോ മുന്നിലാണ്. മിസ്സിസാഗയുടെ മുൻ മേയർ ബോണി ക്രോംബി ഏകദേശം 22 ശതമാനം വോട്ടുകളുമായി മൂന്നാം സ്ഥാനത്താണ്.
നിലവിലെ മേയർ ആൻഡ്രിയ ഹോർവാത്തിനെ പരാജയപ്പെടുത്തി ഹാമിൽട്ടന്‍റെ അടുത്ത മേയറായി കീനിൻ ലൂമിസ് തിരഞ്ഞെടുക്കപ്പെട്ടു. നിലവിലെ വിവരങ്ങൾ പ്രകാരം ഒൻ്റാരിയോ എൻ.ഡി.പി (NDP) മുൻ നേതാവും ഹാമിൽട്ടൺ മുൻ കൗൺസിലറുമായ ആൻഡ്രിയ മൂന്നാം സ്ഥാനത്താണ്. ഹാമിൽട്ടൺ സിറ്റി കൗൺസിലർ റോബ് കൂപ്പർ ഏകദേശം 32 ശതമാനം വോട്ടുകൾ നേടി രണ്ടാം സ്ഥാനത്തെത്തി. ഏകദേശം 60% പോളിങ് ബൂത്തുകളിൽ നിന്നുള്ള വിവരങ്ങൾ ലഭ്യമായപ്പോൾ, കീനിൻ ലൂമിസ് 41% വോട്ടുകൾ നേടി. അതേസമയം ആൻഡ്രിയ ഹോർവാത്തിന് ഏകദേശം 14% വോട്ടുകൾ മാത്രമാണ് നേടാനായത്.
