കാനഡയിൽ പ്രവൃത്തിപരിചയമുള്ള ഫിസിഷ്യൻമാർക്കായി പ്രത്യേകം രൂപീകരിച്ച വിഭാഗത്തിലെ ആദ്യ നറുക്കെടുപ്പിൽ 391 ഡോക്ടർമാർക്ക് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ഇൻവിറ്റേഷൻ നൽകി. വെറും 169 സി.ആർ.എസ് (CRS) പോയിന്റ് നേടിയവർക്ക് വരെ ഇത്തവണ ഇൻവിറ്റേഷൻ കിട്ടി എന്നത് കുടിയേറ്റ ചരിത്രത്തിലെ തന്നെ വലിയൊരു മാറ്റമാണ്. 2021-ലെ കോവിഡ് കാലത്ത് രേഖപ്പെടുത്തിയ 75 പോയിന്റിന് ശേഷം എക്സ്പ്രസ് എൻട്രി ചരിത്രത്തിൽ രേഖപ്പെടുത്തുന്ന ഏറ്റവും കുറഞ്ഞ രണ്ടാമത്തെ കട്ട്-ഓഫ് സ്കോറാണിത്.
രാജ്യത്തെ ഡോക്ടർമാരുടെ ക്ഷാമം പരിഹരിക്കുന്നതിനായി 2025 ഡിസംബറിലാണ് ഈ പുതിയ വിഭാഗം പ്രഖ്യാപിച്ചത്. ഈ ആനുകൂല്യം ലഭിക്കുന്നതിനായി അപേക്ഷകർ കഴിഞ്ഞ മൂന്ന് വർഷത്തിനിടെ കുറഞ്ഞത് ഒരു വർഷമെങ്കിലും കാനഡയിൽ ഫുൾടൈം ഡോക്ടറായി ജോലി ചെയ്തിരിക്കണം. കൂടാതെ എക്സ്പ്രസ് എൻട്രിയുടെ അടിസ്ഥാന യോഗ്യതകളും പാലിച്ചിരിക്കണം. 2026-ൽ ഇതുവരെ നടന്ന എക്സ്പ്രസ് എൻട്രി 9 നറുക്കെടുപ്പുകളിലായി 30,848 അപേക്ഷകർക്ക് ഐആർസിസി ഇൻവിറ്റേഷൻ നൽകിയിട്ടുണ്ട്.
