യുഎസ് പ്രസിഡന്റ് ഡോണള്ഡ് ട്രംപിന്റെ ചര്ച്ചാപാടവത്തെ പ്രശംസിച്ച് ടെസ്ല, സ്പേസ് എക്സ് സിഇഒ ഇലോണ് മസ്ക് രംഗത്ത്. ഗാസയില് 60 ദിവസത്തെ വെടിനിര്ത്തലിന് ഇസ്രായേല് സമ്മതിച്ചുവെന്ന ട്രംപിന്റെ പ്രസ്താവനയ്ക്ക് പിന്നാലെയാണ് മസ്കിന്റെ പ്രതികരണം.
ട്രംപിന്റെ സോഷ്യല് മീഡിയ പ്ലാറ്റ്ഫോമായ ട്രൂത്ത് സോഷ്യലില് അദ്ദേഹം പങ്കുവെച്ച വെടിനിര്ത്തല് ധാരണയെക്കുറിച്ചുള്ള പോസ്റ്റിന്റെ സ്ക്രീന്ഷോട്ട് സഹിതം, ‘അര്ഹിക്കുന്നവര്ക്ക് അംഗീകാരം നല്കണം. @realDonaldTrump ലോകമെമ്പാടുമുള്ള നിരവധി ഗുരുതരമായ സംഘര്ഷങ്ങള് വിജയകരമായി പരിഹരിച്ചു,’ എന്ന് മസ്ക് എക്സില് കുറിച്ചു. ‘വണ് ബിഗ്, ബ്യൂട്ടിഫുള് ബില്” സംബന്ധിച്ച് ട്രംപുമായുള്ള തര്ക്കങ്ങള് രൂക്ഷമാകുന്നതിനിടെയാണ് മസ്കിന്റെ ഈ പ്രശംസ.
