ഉയരുന്ന ജീവിതച്ചെലവിന് അനുസരിച്ച് ഒൻ്റാരിയോ അടക്കം അഞ്ച് കനേഡിയൻ പ്രവിശ്യകൾ മിനിമം വേതനം വർധിപ്പിച്ചു. ഒൻ്റാരിയോ, പ്രിൻസ് എഡ്വേഡ് ഐലൻഡ്, നോവസ്കോഷ, മാനിറ്റോബ, സസ്കാച്വാൻ എന്നീ പ്രവിശ്യകളാണ് മിനിമം വേതനം 25 മുതൽ 40 സെൻ്റ് വരെ വർധിപ്പിച്ചത്. അതേസമയം 2019 മുതൽ മിനിമം വേതനം വർധിപ്പിക്കാത്ത ആൽബർട്ട ഒഴികെയുള്ള എല്ലാ പ്രവിശ്യകളും പ്രദേശങ്ങളും ഈ വർഷം തങ്ങളുടെ വേതന നിരക്ക് ഉയർത്തിയിട്ടുണ്ട്. കാനഡയിൽ ഏറ്റവും കുറഞ്ഞ മിനിമം വേതനമുള്ള ആൽബർട്ടയിൽ ഇത് മണിക്കൂറിൽ 15 ഡോളറായി തുടരുന്നു. സെപ്റ്റംബർ ഒന്നിന് മിനിമം വേതനം വർധിപ്പിച്ച നൂനവൂട്ടാണ് മണിക്കൂറിൽ 20 ഡോളറിലധികം തുകയുമായി രാജ്യത്ത് ഏറ്റവും മുന്നിൽ നിൽക്കുന്നത്.
ഒൻ്റാരിയോയിലെ മിനിമം വേതനം മണിക്കൂറിൽ 17.95 ഡോളറായി വർധിപ്പിച്ചപ്പോൾ പ്രിൻസ് എഡ്വേഡ് ഐലൻഡിൽ 17.30 ഡോളറായും നോവസ്കോഷയിൽ 17 ഡോളറുമായും നിരക്ക് ഉയർത്തി. മാനിറ്റോബയിലെ പുതിയ മിനിമം വേതനം 16.40 ഡോളറാണ്. സസ്കാച്വാൻ സർക്കാർ 15.70 ഡോളറായും മിനിമം വേതനം ഉയർത്തിയിട്ടുണ്ട്.
