അമേരിക്കൻ സ്വാതന്ത്ര്യദിനമായ ജൂലൈ നാലിന് ന്യൂയോർക്കിലെ ബ്രൂക്ലിനിലുള്ള കോണി ഐലൻഡിൽ ഉണ്ടായ വെടിവെപ്പിൽ നാല് കുട്ടികളടക്കം എട്ട് പേർക്ക് പരുക്കേറ്റു. വെള്ളിയാഴ്ച പ്രാദേശിക സമയം രാത്രി പത്തരയോടെയാണ് കോണി ഐലൻഡിലെ വെസ്റ്റ് 31-ാം സ്ട്രീറ്റിലാണ് സംഭവം. വെടിവെപ്പിൽ 14, 12, 7, 6 വയസ്സ് പ്രായമുള്ള നാല് ആൺകുട്ടികൾക്കും പരുക്കേറ്റിട്ടുണ്ട്.
ഇവരെ സമീപത്തെ വിവിധ ആശുപത്രികളിൽ പ്രവേശിപ്പിച്ചു. പരുക്കേറ്റവരിൽ ഏഴു പേരുടെ നില നിലവിൽ തൃപ്തികരമാണെന്നും എന്നാൽ 21 വയസ്സുള്ള യുവതിയുടെ നില അതീവ ഗുരുതരമായി തുടരുകയാണെന്നും എൻവൈപിഡി അറിയിച്ചു. സംഭവസ്ഥലത്തുനിന്ന് അന്വേഷണസംഘം ഒരു തോക്ക് കണ്ടെടുത്തിട്ടുണ്ട്. നിലവിൽ ആരെയും അറസ്റ്റ് ചെയ്തിട്ടില്ല. അന്വേഷണം പുരോഗമിക്കുന്നു.
