മലപ്പുറം ജില്ലയിലെ വണ്ടൂർ പഞ്ചായത്തിൽ മഞ്ഞപ്പിത്തം അതിവേഗം പടരുന്നതായി റിപ്പോർട്ട്. മഞ്ചേരി റോഡിലെ ഒരു റെസ്റ്റോറന്റിൽ നിന്ന് ഭക്ഷണം കഴിച്ചവർക്കാണ് കൂടുതലായി രോഗബാധയുണ്ടായിട്ടുള്ളത്. ഇന്നലെ മാത്രം 15 പേർക്ക് രോഗം സ്ഥിരീകരിച്ച സാഹചര്യത്തിൽ, വരും ദിവസങ്ങളിൽ രോഗബാധിതരുടെ എണ്ണം വർദ്ധിക്കാൻ സാധ്യതയുണ്ടെന്ന് അധികൃതർ വിലയിരുത്തുന്നു. മഞ്ഞപ്പിത്തത്തിന് പുറമെ എലിപ്പനി, വൈറൽ പനി, അഞ്ചാംപനി, വയറിളക്കരോഗങ്ങൾ തുടങ്ങിയവയും മലയോര മേഖലയിൽ പടരുന്നുണ്ടെന്ന് നേരത്തെ തന്നെ മാധ്യമങ്ങൾ ചൂണ്ടിക്കാണിച്ചിരുന്നു. ഇതിനിടയിൽ പനി ബാധിച്ച് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന പോരൂർ പഞ്ചായത്തിലെ രണ്ട് യുവാക്കൾ മരണപ്പെടുകയുമുണ്ടായി.
രോഗവ്യാപനം രൂക്ഷമായതിനെത്തുടർന്ന് ആരോഗ്യ വകുപ്പും പഞ്ചായത്ത് അധികൃതരും ചേർന്ന് പ്രതിരോധ, ബോധവൽക്കരണ പ്രവർത്തനങ്ങൾ ഊർജ്ജിതമാക്കിയിട്ടുണ്ട്. കണ്ണിലും മൂത്രത്തിലും മഞ്ഞനിറം, ക്ഷീണം, വയറുവേദന, ഛർദ്ദി തുടങ്ങിയ ലക്ഷണങ്ങൾ ഉള്ളവർ ഉടൻ തന്നെ വൈദ്യപരിശോധന നടത്തണമെന്നും സ്വയം ചികിത്സ ഒഴിവാക്കണമെന്നും കർശന നിർദ്ദേശമുണ്ട്. കുടിവെള്ള സ്രോതസ്സുകൾ ക്ലോറിനേഷൻ ചെയ്യുക, തിളപ്പിച്ചാറിയ വെള്ളം മാത്രം കുടിക്കുക, വ്യക്തിശുചിത്വം പാലിക്കുക, പഴകിയ ഭക്ഷണങ്ങളും പാനീയങ്ങളും ഒഴിവാക്കുക തുടങ്ങിയ മുൻകരുതലുകൾ പാലിക്കണമെന്ന് അധികൃതർ അഭ്യർത്ഥിച്ചു.
കൂടാതെ, രോഗവ്യാപനം തടയുന്നതിന്റെ ഭാഗമായി ഭക്ഷണ വിൽപ്പനശാലകളിൽ ശുചിത്വ പരിശോധനയ്ക്കായി ഉദ്യോഗസ്ഥരെ നിയോഗിച്ചിട്ടുണ്ട്. ഭക്ഷണ പാചകത്തിലും വിതരണത്തിലും ഏർപ്പെട്ടിരിക്കുന്നവരും നിർബന്ധമായും ആരോഗ്യ പരിശോധന നടത്തണമെന്ന് നിർദ്ദേശമുണ്ട്. വാർഡ് തലങ്ങളിൽ ആശാപ്രവർത്തകരുടെയും ജനപ്രതിനിധികളുടെയും നേതൃത്വത്തിൽ പ്രതിരോധ പ്രവർത്തനങ്ങളും പരിശോധനകളും പുരോഗമിക്കുകയാണ്.
