ഇന്ത്യയുൾപ്പെടെ നാല് ഏഷ്യൻ രാജ്യങ്ങളിൽനിന്നുള്ള വിദ്യാർത്ഥികൾക്ക് വിസ നൽകുന്നതിൽ കർശന നിയന്ത്രണങ്ങളുമായി ഓസ്ട്രേലിയ. ഇന്ത്യക്ക് പുറമെ നേപ്പാൾ, ബംഗ്ലാദേശ്, ഭൂട്ടാൻ എന്നീ രാജ്യങ്ങളെയാണ് ഓസ്ട്രേലിയയുടെ ‘സിംപ്ലിഫൈഡ് സ്റ്റുഡന്റ് വിസ ഫ്രെയിംവർക്കിന്’ (SSVF) കീഴിൽ പുതുതായി ‘ഹൈ-റിസ്ക്’ വിഭാഗത്തിൽ ഉൾപ്പെടുത്തിയത്. ജനുവരി എട്ട് മുതൽ ഈ മാറ്റം പ്രാബല്യത്തിൽ വന്നു.
നേരത്തെ ഇടത്തരം അപകടസാധ്യതയുള്ള ‘എവിഡൻസ് ലെവൽ 2’ വിഭാഗത്തിലായിരുന്ന ഈ രാജ്യങ്ങളെ, ഏറ്റവും ഉയർന്ന ജാഗ്രത വേണ്ട ‘എവിഡൻസ് ലെവൽ 3’ വിഭാഗത്തിലേക്കാണ് ഇപ്പോൾ മാറ്റിയിരിക്കുന്നത്. സാധാരണ അവലോകന കാലയളവിനു മുൻപേ എടുത്ത ഈ തീരുമാനം തികച്ചും അസാധാരണമാണെന്നാണ് വിദ്യാഭ്യാസ വിദഗ്ധരുടെ വിലയിരുത്തൽ.
വിദ്യാർത്ഥി വിസ സംവിധാനത്തിൽ വർദ്ധിച്ചുവരുന്ന ക്രമക്കേടുകൾ തടയാനും സുതാര്യത ഉറപ്പാക്കാനുമാണ് ഇത്തരമൊരു നീക്കമെന്ന് ഓസ്ട്രേലിയൻ അധികൃതർ വ്യക്തമാക്കി. വിസ നടപടികളിലെ ദുരുപയോഗം തടയുന്നതിനൊപ്പം തന്നെ, പഠനത്തിനായി എത്തുന്ന യഥാർത്ഥ വിദ്യാർത്ഥികൾക്ക് മികച്ച വിദ്യാഭ്യാസ സൗകര്യങ്ങളും മികച്ച അനുഭവങ്ങളും ഉറപ്പാക്കാൻ ഈ കർശന പരിശോധനകൾ സഹായിക്കുമെന്ന് അധികൃതർ വിശദീകരിക്കുന്നു.
2025-ലെ കണക്കുകൾ പ്രകാരം ഓസ്ട്രേലിയയിലെ അന്താരാഷ്ട്ര വിദ്യാർത്ഥികളിൽ മൂന്നിലൊന്നും ഈ നാല് രാജ്യങ്ങളിൽ നിന്നുള്ളവരാണ്. പുതിയ നിയമങ്ങൾ പ്രാബല്യത്തിൽ വരുന്നതോടെ വിസാ നടപടികളിൽ വലിയ തോതിലുള്ള കാലതാമസമുണ്ടാകാൻ സാധ്യതയുണ്ട്. എന്നിരുന്നാലും, പഠനകാര്യത്തിൽ കൃത്യമായ ലക്ഷ്യബോധമുള്ള യഥാർത്ഥ വിദ്യാർത്ഥികളെ സ്വാഗതം ചെയ്യുന്നതായും അവർക്ക് ആവശ്യമായ എല്ലാ പിന്തുണയും നൽകുമെന്നും ഓസ്ട്രേലിയൻ സർക്കാർ അറിയിച്ചിട്ടുണ്ട്.
