കാനഡയിൽ ജനിച്ചവരിൽ വീട് സ്വന്തമാക്കുന്നവരെ അപേക്ഷിച്ച് കുടിയേറ്റക്കാരുടെ ഹൗസ് ഓണർഷിപ്പ് നിരക്ക് കുത്തനെ വർധിച്ചതായി സ്റ്റാറ്റിസ്റ്റിക്സ് കാനഡയുടെ പുതിയ റിപ്പോർട്ട്. ഒൻ്റാരിയോയിൽ അഞ്ച് വർഷമായി താമസിക്കുന്ന പുതിയ കുടിയേറ്റക്കാരുടെ ഹൗസ് ഓണർഷിപ്പ് നിരക്ക് 2018-ൽ 35.7 ശതമാനമായിരുന്നത് 2021-ൽ 40.2 ശതമാനമായി ഉയർന്നു. ഇതേ കാലയളവിൽ കാനഡയിൽ ജനിച്ചവരുടെ നിരക്ക് 50.7 ശതമാനത്തിൽ നിന്ന് 47.8 ശതമാനമായി താഴ്ന്നു. ദക്ഷിണേഷ്യ, കിഴക്കൻ ഏഷ്യ എന്നിവിടങ്ങളിൽ നിന്നുള്ള കുടിയേറ്റക്കാരാണ് ഒൻ്റാരിയോ, ബ്രിട്ടീഷ് കൊളംബിയ, ആൽബർട്ട തുടങ്ങിയ പ്രവിശ്യകളിൽ വീട് വാങ്ങുന്നതിൽ മുന്നിൽ നിൽക്കുന്നത്.
വർക്ക് അല്ലെങ്കിൽ സ്റ്റഡി പെർമിറ്റുകളിലോ അഭയാർത്ഥികളായോ കാനഡയിൽ എത്തിയ കുടിയേറ്റക്കാരിൽ 85 ശതമാനത്തിലധികവും ആദ്യ വർഷം തന്നെ വീട് സ്വന്തമാക്കിയതായി റിപ്പോർട്ടിൽ പറയുന്നു. കാനഡയിൽ ജനിച്ചവർ അപേക്ഷിച്ച് വരുമാനം കുറവാണെങ്കിലും വിലകൂടിയ വീടുകൾ വാങ്ങാനും വലിയ തുക മോർഗേജ് വായ്പകളായി എടുക്കാനും കുടിയേറ്റക്കാർ തയ്യാറാകുന്നതായി റിപ്പോർട്ട് സൂചിപ്പിക്കുന്നു. രജിസ്റ്റേർഡ് റിട്ടയർമെൻ്റ് സേവിങ്സ് പ്ലാനുകളിൽ നിക്ഷേപിക്കുന്നതിനേക്കാൾ, സ്വന്തമായി ഒരു വീട് വാങ്ങുന്നതിലൂടെയുള്ള ഇക്വിറ്റി കെട്ടിപ്പടുക്കുന്നതിനാണ് ഇവർ മുൻഗണന നൽകുന്നത്. ഇതിനാൽ തന്നെ ഉയർന്ന പ്രതിമാസ മോർഗേജ് തിരിച്ചടവുകൾ ഉള്ളതിനാൽ വിപണിയിലെ മാറ്റങ്ങൾ ഇവരെ കൂടുതൽ ബാധിക്കാൻ സാധ്യതയുണ്ട്.
