AI ഉപയോഗിച്ചുള്ള ‘ഹോം ഇൻവേഷൻ’ തമാശ അപകടകരമെന്ന മുന്നറിയിപ്പുമായി പൊലീസ്. ഒരു വ്യക്തി വീടിനുള്ളിൽ അതിക്രമിച്ച് കയറിയതായി തോന്നിപ്പിക്കുന്ന AI നിർമ്മിത ചിത്രങ്ങൾ അയയ്ക്കുന്നതാണ് പുതിയ തമാശ. കമ്പ്യൂട്ടർ ഉണ്ടാക്കിയ ഈ വ്യാജ ചിത്രങ്ങളിൽ, അതിക്രമിച്ച് കടന്നയാൾ സോഫകളിൽ ഇരിക്കുന്നതോ, കിടക്കയിൽ കിടക്കുന്നതോ, അടുക്കളയിൽ സാധനങ്ങൾ തിരയുന്നതോ ആയിരിക്കും കാണിക്കുന്നത്. TikTok, Instagram, Snapchat തുടങ്ങിയ പ്ലാറ്റ്ഫോമുകളിൽ ഇത് വൈറലായതോടെ, ആഗോളതലത്തിൽ സുരക്ഷാ മുന്നറിയിപ്പുകൾ നൽകേണ്ടി വന്നിരിക്കുകയാണ്.
ഈ തമാശ അനാവശ്യ പരിഭ്രാന്തി സൃഷ്ടിക്കുകയും പലപ്പോഴും പോലീസിൻ്റെ സമയം പാഴാക്കുകയും ചെയ്യുന്നു. ഇത് യഥാർത്ഥമാണെന്ന് കരുതി ഉദ്യോഗസ്ഥർ പ്രതികരിച്ചാൽ അപകടകരമായ സാഹചര്യങ്ങളിലേക്ക് നയിക്കുമെന്നും മാസച്യൂസെറ്റ്സ് പോലീസ് മുന്നറിയിപ്പ് നൽകി. കുട്ടിയുടെ തമാശ കാരണം വീട്ടിൽ ആരോ അതിക്രമിച്ച് കടന്നുവെന്ന് വിശ്വസിച്ച ഒരു രക്ഷിതാവിൽ നിന്ന് സഹായത്തിനായുള്ള കോൾ ലഭിച്ചതായി ഇംഗ്ലണ്ടിലെ പൂൾ പോലീസ് റിപ്പോർട്ട് ചെയ്തു. അയർലൻഡിൽ ഇതുമായി ബന്ധപ്പെട്ട് നിരവധി വ്യാജ മോഷണ കോളുകൾ റിപ്പോർട്ട് ചെയ്തു. ഇത് യഥാർത്ഥ പ്രശ്നങ്ങളിൽ നിന്ന് ഉദ്യോഗസ്ഥരെ വഴിതിരിച്ചു വിടാൻ കാരണമായി. യഥാർത്ഥ അടിയന്തിര കോളുകൾക്ക് സഹായം ലഭിക്കുന്നത് വൈകിപ്പിക്കാൻ ഈ തമാശ കാരണമാകുമെന്ന് ഉദ്യോഗസ്ഥർ മുന്നറിയിപ്പ് നൽകുന്നു.
