രാജ്യത്തെ പൈതൃക റെയിൽവേ പാതകളെ കൂടുതൽ മലിനീകരണമുക്തവും പ്രകൃതിസൗഹൃദവുമാക്കാൻ ലക്ഷ്യമിട്ട് ഹൈഡ്രജൻ ട്രെയിനുകൾ അവതരിപ്പിക്കാൻ ഇന്ത്യൻ റെയിൽവേ ഒരുങ്ങുന്നു. ഊട്ടി, ഡാർജീലിങ്, കൽക്ക-ഷിംല തുടങ്ങി 30-ലേറെ പ്രധാനപ്പെട്ട പൈതൃക കേന്ദ്രങ്ങളെയാണ് ഈ പദ്ധതിക്കായി തെരഞ്ഞെടുത്തിട്ടുള്ളത്. പരിസ്ഥിതി മലിനീകരണം ഉണ്ടാക്കുന്ന പരമ്പരാഗത എഞ്ചിനുകൾക്ക് പകരം, നീരാവി മാത്രം പുറന്തള്ളുന്ന പുതിയ ഹൈഡ്രജൻ ട്രെയിനുകൾ എത്തുന്നതോടെ മലയോര മേഖലകളിലെ പ്രകൃതിമനോഹരമായ കാഴ്ചകൾ കൂടുതൽ പരിശുദ്ധമായി സംരക്ഷിക്കപ്പെടും.
ഈ മേഖലകളിലെ കുന്നിൻ ചെരുവുകളും കൊടുംവളവുകളും തുരങ്കങ്ങളും നിറഞ്ഞ ഭൂപ്രകൃതി കാരണം ട്രാക്കുകളുടെ വികസനമോ പരമ്പരാഗത രീതിയിലുള്ള വൈദ്യുതീകരണമോ സാധ്യമല്ല. വലിയ ഇലക്ട്രിക് പോസ്റ്റുകളും ലൈനുകളും സ്ഥാപിക്കുന്നത് പ്രദേശത്തിന്റെ സൗന്ദര്യത്തിന് തടസ്സമാകുകയും ചെയ്യും. ഹരിയാനയിലെ ജിന്ദ്-സോനിപ്പത്ത് പാതയിൽ അടുത്തിടെ പ്രധാനമന്ത്രി ഉദ്ഘാടനം ചെയ്ത കരുത്തുറ്റ ഹൈഡ്രജൻ ട്രെയിൻ ഈ രംഗത്ത് വലിയൊരു മുന്നേറ്റമാണ്. നിലവിൽ നിർമ്മാണച്ചെലവ് കൂടുതലാണെങ്കിലും സാങ്കേതികവിദ്യ വികസിക്കുന്നതോടെ വരുംനാളുകളിൽ ഇവ കൂടുതൽ ലാഭകരമായി മാറും.
പ്രകൃതിരമണീയമായ കാഴ്ചകളാൽ വിനോദസഞ്ചാരികളെ ആകർഷിക്കുന്നതാണ് ഇന്ത്യയിലെ പൈതൃക റെയിൽ പാതകൾ. 1881-ൽ ബ്രിട്ടീഷുകാർ നിർമ്മിച്ച 86 കിലോമീറ്റർ നീളമുള്ള ഡാർജീലിങ് ഹിമാലയൻ പാതയും, രാജ്യത്തെ ഏറ്റവും ഉയർന്ന റെയിൽവേ സ്റ്റേഷനായ ‘ഗൂമും’ ഇതിന്റെ മികച്ച ഉദാഹരണങ്ങളാണ്. കൂടാതെ 2008-ൽ യുനെസ്കോ പൈതൃക പട്ടികയിൽ ഇടംനേടിയ 96 കിലോമീറ്റർ നീളമുള്ള കൽക്ക-ഷിംല പാതയും മലനിരകൾക്കിടയിലൂടെയുള്ള അവിസ്മരണീയമായ യാത്രാനുഭവം സമ്മാനിക്കുന്നു.
സിനിമകളിലൂടെയും മറ്റും ഏവർക്കും പ്രിയങ്കരമായ ഊട്ടി ട്രെയിൻ പാതയും ഈ മാറ്റത്തിന്റെ ഭാഗമാകും. മേട്ടുപ്പാളയം മുതൽ ഊട്ടി വരെയുള്ള 46 കിലോമീറ്റർ ദൂരം 16 തുരങ്കങ്ങളും 250 പാലങ്ങളും 208 വളവുകളും കടന്ന് അഞ്ച് മണിക്കൂർ കൊണ്ടാണ് ഈ ട്രെയിൻ പിന്നിടുന്നത്. മണിക്കൂറിൽ കേവലം 10.4 കിലോമീറ്റർ മാത്രം വേഗതയുള്ള ഈ പാതയിലാണ് ഇന്ത്യയിലെ ഏറ്റവും വേഗം കുറഞ്ഞ ട്രെയിൻ സർവീസുള്ളത്. ഹൈഡ്രജൻ ട്രെയിനുകൾ യാഥാർത്ഥ്യമാകുന്നതോടെ പ്രകൃതിഭംഗിക്ക് ഒട്ടും കോട്ടം തട്ടാതെ ഈ ചരിത്ര പാതകളിലൂടെയുള്ള യാത്രകൾ പുതിയൊരു അനുഭവമായി മാറും.
