ബ്രിട്ടീഷ് കൊളംബിയ, ഒൻ്റാരിയോ, ക്യുബെക്ക് എന്നീ പ്രവിശ്യകളിലായി മൂന്ന് ഫെഡറൽ ഉപതിരഞ്ഞെടുപ്പുകൾ തിങ്കളാഴ്ച നടക്കും. ബ്രിട്ടീഷ് കൊളംബിയയിലെ നോർത്ത് വൻകൂവർ-കാപിലാനോ റൈഡിങിൽ മുൻ ഫെഡറൽ മന്ത്രി ജോനാഥൻ വിൽക്കിൻസൺ രാജിവെച്ച ഒഴിവിലാണ് മത്സരം. പ്രധാനമന്ത്രി മാർക്ക് കാർണിയുടെ മുൻ ഡെപ്യൂട്ടി ചീഫ് ഓഫ് സ്റ്റാഫ് ബ്രെയ്ഡൻ കാലേയാണ് ലിബറൽ സ്ഥാനാർത്ഥി. കഴിഞ്ഞ തിരഞ്ഞെടുപ്പിൽ രണ്ടാമതെത്തിയ സ്റ്റീഫൻ കറൻ കൺസർവേറ്റീവുകൾക്കായും, സ്റ്റീഫൻ ട്വീഡെയ്ല്‍ എൻഡിപി-ക്കായും ജനവിധി തേടുന്നു.
ഒൻ്റാരിയോയിലെ ബീച്ചസ്-ഈസ്റ്റ് യോർക്ക് സീറ്റിൽ മുൻ എം പി നെയ്റ്റ് എർസ്കിൻ-സ്മിത്തിന്‍റെ ഒഴിവിലേക്ക് ലിബറൽ സ്ഥാനാർത്ഥിയായി തൻവീർ ഷാനവാസും കൺസർവേറ്റീവുകൾക്കായി ജിം സിബ്രോസും എൻഡിപി-ക്കായി ഷാനൻ ഡെവിനും മത്സരിക്കുന്നു. കൺസർവേറ്റീവ് പാർട്ടിയുടെ ശക്തികേന്ദ്രമായ ക്യുബെക്കിലെ ഷികൗട്ടിമി-ലെ ഫ്ജോർഡ് റൈഡിങിലാണ് കടുത്ത മത്സരം നടക്കുന്നത്. മുൻ കൺസർവേറ്റീവ് എം.പി റിച്ചാർഡ് മാർടെൽ സെനറ്റിലേക്ക് നാമനിർദ്ദേശം ചെയ്യപ്പെട്ടതിനെത്തുടർന്നാണ് ഇവിടെ ഉപതിരഞ്ഞെടുപ്പ് നടക്കുന്നത്. ഡെയറി കർഷകനായ ഡാനിയൽ ഗോബെയ്‌ലാണ് ഇവിടെ ലിബറൽ പാർട്ടിക്കായി മത്സരരംഗത്തുള്ളത്.
നിലവിൽ 171 സീറ്റുകളാണ് ഭരണകക്ഷിയായ ലിബറൽ പാർട്ടി ഹൗസ് ഓഫ് കോമൺസിലുള്ളത്. കൺസർവേറ്റീവുകൾക്ക് 139 ഉം ബ്ലോക്ക് ക്യുബെക്വയ്ക്ക് 21 ഉം എൻ.ഡി.പിക്ക് അഞ്ചും ഗ്രീൻ പാർട്ടിക്ക് ഒരു സീറ്റുമുണ്ട്. കഴിഞ്ഞ ഏപ്രിലിൽ നടന്ന ഉപതിരഞ്ഞെടുപ്പുകളിലെ വിജയത്തോടെയാണ് ലിബറൽ പാർട്ടി ഹൗസ് ഓഫ് കോമൺസിൽ ഭൂരിപക്ഷം ഉറപ്പിച്ചത്. സഭയിൽ ആകെയുള്ള ആറ് ഒഴിവുകളിൽ മൂന്നെണ്ണത്തിലേക്കാണ് ഇപ്പോൾ തിരഞ്ഞെടുപ്പ് നടക്കുന്നത്. വരും മാസങ്ങളിൽ ശേഷിക്കുന്ന സീറ്റുകളിലേക്കും ഉപതിരഞ്ഞെടുപ്പ് പ്രഖ്യാപിക്കും.
