ചരിത്രത്തിലേക്ക് ചുവടുവെച്ച് കാൽഗറി പൊലീസ് സർവീസ്. ജൂൺ ഒന്ന് മുതൽ കാൽഗറിയിലെ പൊലീസ് ഉദ്യോഗസ്ഥർ ധരിക്കുന്ന ബോഡി ക്യാമറകളിൽ എഐ അധിഷ്ഠിതമായ തത്സമയ പരിഭാഷാ സംവിധാനം ഏർപ്പെടുത്തും. ഉദ്യോഗസ്ഥർ സംസാരിക്കുന്നത് അപ്പോൾ തന്നെ അറുപതിലധികം ഭാഷകളിലേക്ക് വിവർത്തനം ചെയ്യാൻ ഈ സാങ്കേതികവിദ്യയിലൂടെ സാധിക്കും. കാനഡയിൽ ഈ സംവിധാനം പൂർണ്ണമായി നടപ്പിലാക്കുന്ന ആദ്യ പോലീസ് സേനയാണ് കാൽഗറി. ആൽബർട്ടയിൽ എല്ലാ മുൻസിപ്പൽ പോലീസ് ഉദ്യോഗസ്ഥർക്കും നിലവിൽ ബോഡി ക്യാമറകൾ നിർബന്ധമാണ്.
ഭാഷാപരമായ തടസ്സങ്ങൾ നീക്കാനും, അടിയന്തര സാഹചര്യങ്ങളിൽ അതിവേഗം ഇടപെടാനും, വിവിധ ഭാഷകൾ സംസാരിക്കുന്ന പ്രവാസികളുമായി നല്ല ബന്ധം സ്ഥാപിക്കാനും ഈ മാറ്റം സഹായിക്കുമെന്ന് അധികൃതർ പറഞ്ഞു. ക്യാമറയിലെ ഒരു ബട്ടൺ അമർത്തിയാൽ ഈ സംവിധാനം പ്രവർത്തിച്ചു തുടങ്ങും. ഈ വിവർത്തനങ്ങൾ വീഡിയോയോടൊപ്പം തന്നെ റെക്കോർഡ് ചെയ്യപ്പെടും.
വരും വർഷങ്ങളിൽ കാനഡയിലെ കൂടുതൽ പോലീസ് സേനകൾ ഈ സാങ്കേതികവിദ്യ സ്വീകരിക്കുമെന്നാണ് കരുതുന്നത്. നിലവിൽ തെളിവുകൾ പരിശോധിക്കുന്നതിനും ഫയലുകൾ ക്രമീകരിക്കുന്നതിനും കാൽഗറി പോലീസ് എ.ഐ ഉപയോഗിക്കുന്നുണ്ട്. ഇതിലൂടെ വൻ സാമ്പത്തിക ലാഭവും സമയലാഭവുമാണ് സേനയ്ക്കുണ്ടായിട്ടുള്ളത്.
