രാജ്യത്തുടനീളമുള്ള വിവിധ വിനോദസഞ്ചാര കേന്ദ്രങ്ങളിൽ സൗജന്യ പ്രവേശനവും ഇളവുകളും ലഭിക്കുന്ന കാനഡ സ്ട്രോങ് പാസിന് തുടക്കമായതോടെ വിനോദസഞ്ചാരികളെ കാത്ത് ബാൻഫ് നാഷണൽ പാർക്ക്. കാനഡ സ്ട്രോങ്ങ് പാസ് നടപ്പിലാക്കിയതോടെ മനോഹരമായ വിനോദസഞ്ചാര നഗരമായ ബാൻഫിൽ 2025-26 സാമ്പത്തിക വർഷത്തിൽ റെക്കോർഡ് സന്ദർശകർ എത്തിയതായി ബാൻഫ് ടൗൺ മേയർ കോറി ഡിമാനോ അറിയിച്ചു. 4.5 ദശലക്ഷത്തിലധികം ആളുകളാണ് കഴിഞ്ഞ സീസണിൽ ബാൻഫിൽ എത്തിയത്. തിരക്ക് പരിഗണിച്ച് സന്ദർശകർ പൊതുഗതാഗതം തിരഞ്ഞെടുക്കാനും മേയർ നിർദ്ദേശിച്ചു.

വെള്ളിയാഴ്ച തുടക്കമായി. റെയിൽ വഴിയുള്ള യാത്രയിൽ കിഴിവുകളും മ്യൂസിയങ്ങളിലേക്കും ദേശീയ പാർക്കുകളിലേക്കും സൗജന്യ പ്രവേശനവും വാഗ്ദാനം ചെയ്യുന്ന ഈ പാസ് ജൂൺ 19 മുതൽ സെപ്റ്റംബർ 7 വരെ ലഭ്യമാകും. എല്ലാ പാർക്ക്സ് കാനഡ സൈറ്റുകളിലേക്കും സൗജന്യ പ്രവേശനവും ക്യാമ്പിംഗ് ഫീസിൽ 25 ശതമാനം കിഴിവും ലഭിക്കും. നാഷണൽ മ്യൂസിയങ്ങൾ 18 വയസ്സിന് താഴെയുള്ള കുട്ടികൾക്ക് സൗജന്യ പ്രവേശനവും 18 മുതൽ 24 വയസ്സ് വരെ പ്രായമുള്ളവർക്ക് 50 ശതമാനം കിഴിവും വാഗ്ദാനം ചെയ്യുന്നു.