ബംഗാൾ ഉൾക്കടലിൽ രൂപംകൊണ്ട ‘അർണബ്’ ചുഴലിക്കാറ്റ് ബുധനാഴ്ച ഉച്ചയോടെ ആന്ധ്രയിലെ ബാപ്റ്റലയ്ക്കും വിശാഖപട്ടണത്തിനുമിടയിൽ കരതൊടുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. നിലവിൽ മണിക്കൂറിൽ 15 കിലോമീറ്റർ വേഗതയിൽ പടിഞ്ഞാറേക്ക് നീങ്ങുന്ന കാറ്റ്, വൈകാതെ അതിതീവ്ര ചുഴലിക്കാറ്റായി മാറും. കരതൊടുന്ന സമയത്ത് കാറ്റിന്റെ വേഗത മണിക്കൂറിൽ 140 കിലോമീറ്റർ വരെ ഉയർന്നേക്കാം. നിലവിൽ ഗോപാൽപൂരിൽ നിന്നും വിശാഖപട്ടണത്തു നിന്നും നൂറുകണക്കിന് കിലോമീറ്റർ അകലെയാണെങ്കിലും, അപകടസാധ്യത കണക്കിലെടുത്ത് ആന്ധ്ര, ഒഡിഷ തീരങ്ങളിൽ റെഡ് അലർട്ട് പ്രഖ്യാപിക്കുകയും മത്സ്യത്തൊഴിലാളികളോട് ഉടൻ തിരിച്ചെത്താൻ ആവശ്യപ്പെടുകയും ചെയ്തിട്ടുണ്ട്.
ചുഴലിക്കാറ്റിന്റെ സ്വാധീനത്താൽ കേരളത്തിലും ശക്തമായ മഴയ്ക്ക് സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ തെക്കൻ-മധ്യ ജില്ലകളിൽ കാലാവസ്ഥാ വകുപ്പ് യെല്ലോ അലർട്ട് ഏർപ്പെടുത്തിയിട്ടുണ്ട്. അടുത്ത 24 മണിക്കൂറിൽ ഈ പ്രദേശങ്ങളിൽ 64.5 മി.മീ മുതൽ 115.5 മി.മീ വരെ കനത്ത മഴ പെയ്യുമെന്നാണ് പ്രവചനം. ആന്ധ്രയ്ക്കും ഒഡിഷയ്ക്കും പുറമേ തമിഴ്‌നാട്, ബംഗാൾ തീരങ്ങളിലും ജാഗ്രതാ നിർദേശം നൽകിയിട്ടുണ്ട്.
