കാനഡയില്‍ മേയ് മാസത്തില്‍ അപ്രതീക്ഷിതമായി 88,000 തൊഴിലവസരങ്ങള്‍ വര്‍ധിച്ചതായി സ്റ്റാറ്റിസ്റ്റിക്‌സ് കാനഡയുടെ റിപ്പോർട്ട്. ഇതോടെ രാജ്യത്തെ തൊഴിലില്ലായ്മ നിരക്ക് ഏപ്രിലിലെ 6.9 ശതമാനത്തില്‍ നിന്ന് 6.6 ശതമാനമായി കുറഞ്ഞു. മേയ് മാസത്തില്‍ വെറും 10,000 തൊഴിലവസരങ്ങള്‍ മാത്രമാണ് സാമ്പത്തിക വിദഗ്ദ്ധര്‍ പ്രതീക്ഷിച്ചിരുന്നത്. എന്നാല്‍ നിര്‍മ്മാണം, ഗതാഗതം തുടങ്ങിയ മേഖലകളിലുണ്ടായ മുന്നേറ്റം വിപണിക്ക് കരുത്തായി. പ്രത്യേകിച്ച് പൂര്‍ണ്ണസമയ ജോലികളിലാണ് വലിയ വര്‍ധനയുണ്ടായത്. അതേസമയം, ഹോള്‍സെയില്‍-റീട്ടെയ്ല്‍ മേഖലകളില്‍ 35,000 തൊഴിലുകള്‍ നഷ്ടപ്പെടുകയും ചെയ്തു.
ബാങ്ക് ഓഫ് കാനഡ പലിശ നിരക്കുകള്‍ സംബന്ധിച്ച നിര്‍ണ്ണായക തീരുമാനം പ്രഖ്യാപിക്കാന്‍ ദിവസങ്ങള്‍ മാത്രം ബാക്കിനില്‍ക്കെയാണ് ഈ റിപ്പോര്‍ട്ട് പുറത്തുവന്നിരിക്കുന്നത്. പുതിയ കണക്കുകള്‍ കനേഡിയന്‍ സമ്പദ്‌വ്യവസ്ഥയുടെ കരുത്ത് തെളിയിക്കുന്നതാണെന്നും രാജ്യം സാമ്പത്തിക മാന്ദ്യത്തിലേക്ക് നീങ്ങുകയാണെന്ന ആശങ്കകള്‍ക്ക് ഇതൊടുക്കം കുറിക്കുമെന്നും വിദഗ്ദ്ധര്‍ വിലയിരുത്തുന്നു.
