മയാമി : തുടർച്ചയായി പെയ്യുന്ന കനത്ത മഴയെ തുടർന്ന് തെക്കൻ ഫ്ലോറിഡയിൽ വെള്ളപ്പൊക്ക ഭീഷണി ശക്തമാകുന്നു. മയാമി-ഡെയ്ഡ് കൗണ്ടിയിൽ നാഷണൽ വെതർ സർവീസ് വ്യാഴാഴ്ച രാവിലെ പുതിയ പ്രളയ മുന്നറിയിപ്പ് നൽകി. ചൊവ്വാഴ്ച മുതൽ തെക്കൻ ഫ്ലോറിഡയുടെ വിവിധ മേഖലകളിൽ 15 ഇഞ്ചിലധികം മഴയാണ് ലഭിച്ചത്. കനത്ത മഴയിൽ പ്രധാന റോഡുകളിലടക്കം വെള്ളം കയറിയതോടെ നിരവധി വാഹനങ്ങൾ യാത്രയ്ക്കിടെ കുടുങ്ങി. വെള്ളപ്പൊക്ക ഭീഷണിയെ തുടർന്ന് പ്രദേശത്തെ നിരവധി സ്കൂളുകൾക്ക് അവധി നൽകിയിരുന്നു.
കൂടുതൽ മഴയ്ക്ക് സാധ്യത; ജാഗ്രത തുടരണമെന്ന് മുന്നറിയിപ്പ്
മഴ തുടരാനുള്ള സാധ്യത കണക്കിലെടുത്ത് താഴ്ന്ന പ്രദേശങ്ങളിൽ വെള്ളക്കെട്ട് കൂടുതൽ രൂക്ഷമായേക്കുമെന്ന് അധികൃതർ മുന്നറിയിപ്പ് നൽകി. ഇതിന്റെ ഭാഗമായി തെക്കൻ ഫ്ലോറിഡയിലെ വിവിധ പ്രദേശങ്ങളിൽ വെള്ളപ്പൊക്ക ജാഗ്രതാ നിർദേശം നൽകിയിരുന്നു.








