ദീപാവലി ആഘോഷങ്ങൾക്ക് പിന്നാലെ കനത്ത പുകമഞ്ഞ് മൂടിയതോടെ ഡൽഹിയിലും പരിസര പ്രദേശങ്ങളിലും (എൻ.സി.ആർ) വായുമലിനീകരണം രൂക്ഷമായി തുടരുന്നു. ഗ്രേഡഡ് റെസ്പോൺസ് ആക്ഷൻ പ്ലാനിന്റെ (GRAP) മൂന്നാം ഘട്ട നിയന്ത്രണങ്ങൾ ഏർപ്പെടുത്തിയിട്ടും തലസ്ഥാന നഗരിയിലെ വായുവിന്റെ ഗുണനിലവാരം ‘അതീവ ഗുരുതരം’ എന്ന ഘട്ടത്തിലേക്ക് താഴുകയാണ് ഉണ്ടായത്.
കേന്ദ്ര മലിനീകരണ നിയന്ത്രണ ബോർഡിന്റെ വിവരങ്ങളനുസരിച്ച് രാവിലെ 8.10-ന് ഡൽഹിയിലെ ശരാശരി എയർ ക്വാളിറ്റി ഇൻഡക്സ് (AQI) 483-ൽ എത്തിയിരുന്നു. പതിനഞ്ചിലധികം കേന്ദ്രങ്ങളിൽ 400-ന് മുകളിലാണ് വായു മലിനീകരണം രേഖപ്പെടുത്തിയത്. നഗരത്തിലെ പ്രധാന റോഡുകളെയും ജനവാസ കേന്ദ്രങ്ങളെയും കട്ടിയുള്ള വിഷപ്പുക പൂർണ്ണമായും വിഴുങ്ങിയ അവസ്ഥയിലാണ്.
രൂക്ഷമായ മലിനീകരണം കാരണം ശ്വാസതടസ്സം, കണ്ണെരിച്ചിൽ, കടുത്ത തലവേദന തുടങ്ങിയ ശാരീരിക പ്രയാസങ്ങൾ അനുഭവപ്പെടുന്നതായി യാത്രക്കാർ വ്യക്തമാക്കുന്നു. കനത്ത പുകമഞ്ഞു കാരണം അക്ഷർധാം ക്ഷേത്രം തൊട്ടടുത്തുള്ള മേൽപ്പാലത്തിൽ നിന്നുപോലും കാണാൻ കഴിയാത്ത അവസ്ഥയിലാണ്. കാഴ്ചപരിധി കുറഞ്ഞതോടെ ഡൽഹി-നോയിഡ അതിർത്തിയിലും ഇന്ദർലോകിലും പകൽ സമയത്തും വാഹനങ്ങൾക്ക് ലൈറ്റുകൾ ഓൺ ചെയ്ത് സഞ്ചരിക്കേണ്ടി വരുന്നു. കാലാവസ്ഥയിലെ മാറ്റങ്ങൾ കാരണം വരും മണിക്കൂറുകളിൽ സ്ഥിതി കൂടുതൽ ഗുരുതരമായേക്കാമെന്നും, സവിസ് ഏജൻസിയായ ഐക്യു എയറിന്റെ കണക്കനുസരിച്ച് സൗത്ത് ഡൽഹിയിലെ ഷഫ്ദർജംഗിൽ എയർ ക്വാളിറ്റി ഇൻഡക്സ് 1000 കടന്നതായും റിപ്പോർട്ടുകൾ സൂചിപ്പിക്കുന്നു.
