സംസ്ഥാനത്ത് സ്വകാര്യ ബസുടമകൾ നവംബർ 3 മുതൽ അനിശ്ചിതകാല സമരത്തിന് ഒരുങ്ങുന്നു. കെ.എസ്.ആർ.ടി.സി ‘പ്രിയദർശിനി’ സ്ത്രീ സൗജന്യ ബസ് സർവീസ് ആരംഭിച്ചതോടെ സ്വകാര്യ ബസ് മേഖല കടുത്ത പ്രതിസന്ധിയെ നേരിടുകയാണെന്ന് സമരസമിതി വ്യക്തമാക്കി. ഈ പദ്ധതി കാരണം വെറും നാല് മാസത്തിനുള്ളിൽ സ്വകാര്യ ബസ് ഉടമകൾക്ക് 800 കോടി രൂപയുടെ നഷ്ടമുണ്ടായെന്നാണ് കണക്കാക്കുന്നത്. മിനിമം ബസ് ചാർജ് 15 രൂപയായി ഉയർത്തുക, വിദ്യാർത്ഥികളുടെ കൺസഷൻ നിരക്കുകൾ വർദ്ധിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് ഈ പ്രതിഷേധം.
ഓൾ കേരള ബസ് ഓപ്പറേറ്റേഴ്സ് ഓർഗനൈസേഷൻ, കേരള ബസ് ട്രാൻസ്പോർട്ട് അസോസിയേഷൻ, ഓൾ കേരള ബസ് ഓപ്പറേറ്റേഴ്സ് ഫോറം, കേരള ബസ് ഓപ്പറേറ്റേഴ്സ് കോഓർഡിനേഷൻ കമ്മിറ്റി, കേരള പ്രൈവറ്റ് ബസ് ഓണേഴ്സ് അസോസിയേഷൻ എന്നീ സംഘടനകളുടെ നേതൃത്വത്തിൽ എറണാകുളത്ത് ചേർന്ന സംയുക്ത സമിതി യോഗമാണ് സമര പ്രഖ്യാപനം നടത്തിയത്. വിവിധ ആവശ്യങ്ങൾ ഉന്നയിച്ച് സർക്കാരിന് നിവേദനം നൽകിയിരുന്നെങ്കിലും ഇതുവരെ ചർച്ചകൾക്ക് അധികാരികൾ തയ്യാറായിട്ടില്ലെന്നും അവർ കുറ്റപ്പെടുത്തി.
സ്ത്രീ സൗജന്യ യാത്രാ പദ്ധതി സ്വകാര്യ ബസുകളിലേക്കും വ്യാപിപ്പിച്ച് അതിനുള്ള തുക സർക്കാർ ഉടമകൾക്ക് നൽകുക, രാമചന്ദ്രൻ കമ്മീഷൻ റിപ്പോർട്ടിന്റെ അടിസ്ഥാനത്തിൽ വിദ്യാർത്ഥികളുടെ യാത്രാനിരക്ക് കൂട്ടുക, ഡീസൽ വിലയിലെ നികുതി ഒഴിവാക്കുക എന്നിവയാണ് പ്രധാന ആവശ്യങ്ങൾ. ഇതുകൂടാതെ, ഓൺലൈൻ ടൈമിങ് കോൺഫറൻസ് ഉത്തരവ് പിൻവലിക്കുക, ഓട്ടോമാറ്റിക് ടെസ്റ്റിങ് സ്റ്റേഷൻ സമ്പ്രദായം ഒഴിവാക്കുക, ഗ്രാമവണ്ടികളുടെ സർവീസ് സ്വകാര്യ ബസുകൾ ഇല്ലാത്ത റൂട്ടുകളിലേക്ക് മാത്രമായി പരിമിതപ്പെടുത്തുക, ബസുകളുടെ കാലാവധി നീട്ടിനൽകുക, ഇൻഷുറൻസ് തുക സർക്കാർ ഏറ്റെടുക്കുക തുടങ്ങിയ കാര്യങ്ങളിലും അടിയന്തരമായ തീരുമാനങ്ങൾ ഉണ്ടാകണമെന്ന് ബസുടമകൾ ആവശ്യപ്പെട്ടിട്ടുണ്ട്.
