റിയാദ് അന്താരാഷ്ട്ര വിമാനത്താവളത്തിന് നേരെയുണ്ടായ ഹൂതി ആക്രമണങ്ങളെ അപലപിച്ച് കാനഡ. കനേഡിയൻ പൗരന്മാർക്കായി കോൺസുലാർ സഹായത്തിനായി റിയാദിലെ എംബസി തുറന്നു പ്രവർത്തിക്കുമെന്നും സൗദി അറേബ്യയിലെ കനേഡിയൻ അംബാസഡർ അറിയിച്ചു. റിയാദിൽ എവിടെയെങ്കിലും സൈനിക ആക്രമണത്തിന്റെ അവശിഷ്ടങ്ങൾ കാണുകയാണെങ്കിൽ, അവയിൽ നിന്ന് അകന്നുമാറി അധികൃതരെ അറിയിക്കണമെന്നും സോഷ്യൽ മീഡിയയിൽ ഇതിനെക്കുറിച്ച് പോസ്റ്റ് ചെയ്യരുതെന്നും അംബാസഡർ ജീൻ-ഫിലിപ്പ് ലിൻ്റോ നിർദ്ദേശിച്ചു. സൗദി അറേബ്യയിലേക്കുള്ള അത്യാവശ്യമല്ലാത്ത എല്ലാ യാത്രകളും ഒഴിവാക്കണമെന്നും റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലേക്കുള്ള യാത്രകൾ പൂർണ്ണമായും ഒഴിവാക്കണമെന്നും കാനഡ യാത്രാ മുന്നറിയിപ്പ് നൽകി.
റിയാദിലെ കിങ് ഖാലിദ് വിമാനത്താവളത്തിലും ദമാമിലെ കിങ് ഫഹദ് വിമാനത്താവളത്തിലും ഞായറാഴ്ച വീണ്ടും ഹൂതി ആക്രമണം നടന്നതായി റിപ്പോർട്ടുകൾ ലഭിച്ചിട്ടുണ്ട്. ആക്രമണത്തിലെ ആളപായവും നാശനഷ്ടങ്ങളും വിലയിരുത്തി വരികയാണെന്ന് ജനറൽ അതോറിറ്റി ഓഫ് സിവിൽ ഏവിയേഷൻ (GACA) അറിയിച്ചു. കഴിഞ്ഞ ഒരു പതിറ്റാണ്ടിനിടെ സൗദിയിലുണ്ടായ ഏറ്റവും വലിയ ആക്രമണങ്ങളിലൊന്നായ ശനിയാഴ്ചത്തെ വിമാനത്താവള ആക്രമണത്തിൽ 12 പേർ കൊല്ലപ്പെടുകയും നൂറുകണക്കിന് ആളുകൾക്ക് പരുക്കേൽക്കുകയും ചെയ്തിരുന്നു.
