ഇന്ത്യ-കാനഡ ഉഭയകക്ഷി ബന്ധം മെച്ചപ്പെടുത്തുന്നതിന്‍റെ ഭാഗമായി പ്രധാനമന്ത്രി നരേന്ദ്ര മോദി ഡിസംബർ 11, 12 തീയതികളിൽ കാനഡ സന്ദർശിക്കും. കനേഡിയൻ പ്രധാനമന്ത്രി മാർക്ക് കാർണിയുമായുള്ള ഫോൺ സംഭാഷണത്തിന് പിന്നാലെ ഇന്ത്യൻ ഹൈക്കമ്മീഷനാണ് സന്ദർശന വിവരം പുറത്തുവിട്ടത്.
അതേസമയം വ്യാപാരം, ഊർജ്ജം, സാങ്കേതികവിദ്യ, സുരക്ഷ തുടങ്ങിയ മേഖലകളിൽ സഹകരണം ശക്തമാക്കാൻ ഇരുരാജ്യങ്ങളും തയ്യാറായിട്ടുണ്ട്. ഇരുരാജ്യങ്ങളും തമ്മിലുള്ള സമഗ്ര സാമ്പത്തിക പങ്കാളിത്ത കരാർ (CEPA) ചർച്ചകൾ എത്രയും വേഗം പൂർത്തിയാക്കാൻ ലക്ഷ്യമിടുന്നതായി മാർക്ക് കാർണിയുടെ ഓഫീസ് അറിയിച്ചു. 2030-ഓടെ ഉഭയകക്ഷി വ്യാപാരം ഇരട്ടിയാക്കുക എന്ന ലക്ഷ്യത്തോടെയാണ് നീക്കം. കനേഡിയൻ അന്താരാഷ്ട്ര വ്യാപാര മന്ത്രി മരീന്ദർ സിദ്ധുവിന്‍റെ നേതൃത്വത്തിൽ 300 അംഗ പ്രതിനിധി സംഘം ഇന്ത്യ സന്ദർശിക്കുന്നുണ്ട്. കഴിഞ്ഞ എട്ട് പതിറ്റാണ്ടോളമായി തുടരുന്ന ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ നിർണ്ണായക ചുവടുവെപ്പായി കാനഡ വിദേശകാര്യ മന്ത്രി അനിത ആനന്ദ് കഴിഞ്ഞ ദിവസം ന്യൂഡൽഹിയിലെത്തി നരേന്ദ്ര മോദിയുമായും വിദേശകാര്യ മന്ത്രി ഡോ. എസ്. ജയശങ്കറുമായും ചർച്ച നടത്തിയിരുന്നു.
