അൽബർട്ടയുടെ രാഷ്ട്രീയ ഭാവി നിർണയിക്കുന്നതിൽ നിർണായകമാകുന്ന, ചരിത്രപ്രധാനമായ റഫറണ്ടത്തിന് മുന്നോടിയായി പ്രവിശ്യയിലുടനീളമുള്ള പോളിങ് സ്റ്റേഷനുകളുടെ വിവരങ്ങൾ ഇലക്ഷൻസ് ആൽബർട്ട പ്രസിദ്ധീകരിച്ചു. ഒക്ടോബർ 19-ന് നടക്കുന്ന റഫറണ്ടത്തിൽ ആയിരത്തിനാനൂറിലധികം പോളിങ് സ്റ്റേഷനുകളാണ് ഏജൻസി ഒരുക്കിയിരിക്കുന്നത്. വോട്ടർമാർക്ക് ഇലക്ഷൻസ് ആൽബർട്ടയുടെ ഔദ്യോഗിക വെബ്‌സൈറ്റിൽ മേൽവിലാസം നൽകിയോ, തപാലിൽ ലഭിക്കുന്ന Where to Vote കാർഡ് മുഖേനയോ തങ്ങളുടെ പോളിങ് സ്റ്റേഷൻ കണ്ടെത്താം. കാനഡയുടെ ഭാഗമായി തുടരണമോ അതോ വിട്ടുപോകുന്നതിനായി രണ്ടാമതൊരു വോട്ടെടുപ്പ് നടത്തണമോ എന്നതടക്കം 10 ചോദ്യങ്ങളടങ്ങുന്നതാണ് ഈ റഫറണ്ടം.

ഒക്ടോബർ 13 മുതൽ 17 വരെ നടക്കുന്ന മുൻകൂർ വോട്ടെടുപ്പിനായി 310 പോളിങ് ബൂത്തുകളാണ് ഏജൻസി ഒരുക്കുന്നത്. മുൻകൂട്ടി വോട്ട് ചെയ്യുന്നവർക്ക് തങ്ങളുടെ റൈഡിങ്ങിലെ ഏതൊരു അഡ്വാൻസ് പോളിങ് സ്റ്റേഷനിലും വോട്ട് രേഖപ്പെടുത്താം. പോസ്റ്റൽ ബാലറ്റ് വഴി വോട്ട് ചെയ്യാനുള്ള അപേക്ഷ നൽകാനുള്ള അവസാന തീയതി വെള്ളിയാഴ്ച (സെപ്റ്റംബർ 24) അവസാനിക്കും. ഇതുവരെ 5,20,000-ത്തിലധികം ആളുകൾ തപാൽ വോട്ടിനായി അപേക്ഷിച്ചിട്ടുണ്ടെന്ന് ഇലക്ഷൻസ് അൽബർട്ട റിപ്പോർട്ട് ചെയ്തു.