കേരളത്തിന്റെ സംഗീത ചരിത്രത്തിൽ പുതിയൊരു അധ്യായം കുറിച്ചുകൊണ്ട്, പ്രശസ്ത സംഗീതജ്ഞനും ലോകസമാധാന പ്രവർത്തകനുമായ ഡോ. സണ്ണി സ്റ്റീഫന്റെ ഏറ്റവും പുതിയ സിംഫണി ‘ഹൃദയങ്ങൾ ഒന്നിക്കുന്നു’ (Uniting Hearts) അറ്റ്‌ലാന്റയിലും കോട്ടയത്തുമായി റിലീസ് ചെയ്തു. മാനവികതയുടെയും ലോകശാന്തിയുടെയും സന്ദേശം സംഗീതത്തിലൂടെ പകരുകയെന്ന ലക്ഷ്യത്തോടെയാണ് ഈ വിശിഷ്ട കലാസൃഷ്ടി ഒരുക്കിയിരിക്കുന്നത്. വേൾഡ് പീസ് മിഷന്റെ സ്ഥാപകനും ചെയർമാനുമായ ഡോ. സണ്ണി സ്റ്റീഫൻ, തന്റെ സാമൂഹിക-മാനവിക ദർശനങ്ങളെ അടിത്തറയാക്കിയാണ് ഈ സംഗീതസംരംഭത്തിന് രൂപം നൽകിയിട്ടുള്ളത്.
ഭാഷ, മതം, ജാതി, ദേശം തുടങ്ങിയ അതിര വരമ്പുകൾക്കപ്പുറം മനുഷ്യഹൃദയങ്ങളെ സംയോജിപ്പിക്കാനുള്ള സംഗീതത്തിന്റെ അപാരമായ ശക്തിയെയാണ് ഈ കൃതി ആധാരമാക്കുന്നത്. “ഒരു ഹൃദയം – ഒരു ലോകം” എന്ന കേന്ദ്ര പ്രമേയത്തിലൂന്നി സമാധാനം, മനുഷ്യസേവനം, ഐക്യം, സഹോദര്യം എന്നീ നാല് പ്രധാന ആശയങ്ങൾക്ക് സിംഫണി പ്രാധാന്യം നൽകുന്നു. യുദ്ധങ്ങളും വിദ്വേഷങ്ങളും നിറഞ്ഞ ഇന്നത്തെ ലോകസാഹചര്യത്തിൽ, സംഗീതത്തെ സമാധാനത്തിന്റെ ആഗോള ഭാഷയാക്കി മാറ്റി മനുഷ്യർ തമ്മിലുള്ള അകലം കുറയ്ക്കാനും, സ്നേഹത്തിൽ അധിഷ്ഠിതമായ ഒരു പുതിയ ലോകം കെട്ടിപ്പടുക്കാനുമുള്ള ശക്തമായ ആഹ്വാനമാണ് ഈ പുതിയ സംഗീത വിരുന്ന് മുന്നോട്ടുവെക്കുന്നത്.
